Kena 8 Jun 2020, Kot Nengeri Pskov deka madahka pemutus sida bekaul enggau kes menyadi Gennady Shpakovskiy, ke beumur 61 taun. Iya dituduh ngereja pengawa “ekstremis,” laban iya ngatur gempuru ti mit ba rumah iya. Piak ke bedawa minta Menyadi Gennady dijil pengelama tujuh setengah taun.

Kena pun taun 2018, bala ari Federal State Security (FSB) berengkah matau sida Gennady sebilik. Dalam timpuh beberapa bulan, FSB nya belalai ningaka randau sida sebilik lalu ngemataka semua pengawa sida. Kena pukul 12:45 ngalih hari, 3 Jun 2020, pegawai FSB datai begulai enggau pegawai National Guard Rusia, mechahka pintu apartment sida, tama ke dalam lalu nyelungkai apartment nya pengelama enam jam. Ba maya nya, bisi sekeda orang ke benung begempuru lalu sida semina jenuh aja ngemataka sida.

Bala pegawai FSB ngerampas mayuh tablet enggau talipun binching, lalu nabanka bala Saksi ke endur bukai kena nasat sida. Bala petasat ngeleseka bala Saksi nya, indah ngemba sida lalu madahka sida deka dibuai kereja tauka dijil. Menyadi Gennady ditasat nyentukka pukul 10 malam.

Kena 19 Mac 2019, Menyadi Gennady didawa udah ngatur pengawa gerempung “ekstremis.” Lima bulan pengudah nya, iya mega dituduh “melanja pengawa ekstremis.”

Seraya kitai nganti pemutus ke digaga kot nya, enggau pengandal kitai besampi minta Jehovah nulung sida Gennady sebilik, lalu kitai pan andalka, Jehovah deka merekatka sereta ngupah pengeliat ati sida.—2 Bansa Israel 15:7.