Kot Menua Lensky ba Sakha deka madahka pemutus pasal kes Menyadi Igor Ivashin kena 31 Mac 2020. Piak ke bedawa minta Menyadi Igor Ivashin dijil pengelama tujuh taun.

Kenyau ari Februari 2018, Kot Nengeri Takutsk ngemendarka polis ningaka talipun Menyadi Ivashin enggau chara belalai. Beberapa bulan udah nya, bala piak bekuasa datai ngenyit ngagai lapan buah rumah Saksi Jehovah, nyengkaum rumah Menyadi Ivashin. Iya enggau 21 iku Saksi Jehovah ke bukai dibai ke balai polis lalu ditasat. Piak ke bedawa nuduh Menyadi Ivashin udah ngatur pengawa gerempung ti “ekstremis”.

Kena 20 November 2019, kes nya dipulaika baru ngagai opis piak ke bedawa laban sida nadai chukup bukti kena nunjukka Menyadi Ivashin besalah. Piak ke bedawa nya enda setuju lalu nganjung kes nya ngagai kot menua. Kot nya berengkah meresa kes tu kena Februari 2020.

Menyadi Ivashin enggau bini iya, Natalia, bisi dua iku anak indu. Pemutus ba kes iya nyau enda lama agi deka diberi, nya alai kitai besampika sida Igor sebilik terus “tan natka semua pemerinsa enggau ati ti liat. . . enggau ati ti gaga.”—Kolosi 1:11