Kena 29 April 2021, Kot ba Jewish Autonomous Region besetuju enggau ukum asal ke kala diberi ngagai Menyadi Igor, iya nya ukum jil pengelama dua taun setengah ke ditangguh.

Kena 12 Februari 2021, Kot Pelilih Birobidzhan ba Jewish Autonomous Region ngumbai Menyadi Igor Tsarev besalah. Kot nya meri iya ukum jil pengelama dua taun setengah ti ditangguh.

Sekumbang kes iya dipechara ba kot, iya mengkang taluk sereta ngembuan runding ti positif. Lebuh meri jaku ti penudi ngagai bala ba kot kena 11 Februari 2021, iya madah: “Lebuh aku berundingka baka ni aku deka ngepunka randau aku saritu, aku nemu aku patut nitihka jaku lalau ke diberi rasul Paul ngagai semua orang Kristian. Dalam surat ke ditulis iya ngagai orang Kristian ba Kolosi iya ngasuh sida: ‘Seruran beterima kasih.’”

“Nya kebuah, Hakim, aku deka meri terima kasih ngagai nuan laban nuan meri awak kena meresa kes tu, sereta nentuka nadai penyarut nyadi sepemanjai kes tu dipechara. . . . Tang ke berat agi, aku beterima kasih ngagai Penempa enggau Petara kitai Jehovah, laban iya nyukung aku sekumbang kes jenayah tu diperesa ba kot. Iya ngasuh ati aku tendur ari pengirau sereta meri pemaik dalam ati aku.”—Kolosi 3:15.