Kena 1 Februari 2021, a Kot Pelilih Birobidzhan ba Jewish Autonomous Region deka madahka pemutus pasal kes Menyadi Igor Tsarev. Iya engka deka dijil pengelama empat taun.

Igor Tsarev

• Ada: 1974 (Birakan, Jewish Autonomous Region)

• Biograpi: Iya bisi dua iku menyadi indu ke biak ari iya. Lebuh iya agi besekula, iya bekereja nebang kayu, nyadi tukang kayu sereta masang tali karan kena nulung melanja diri sebilik. Iya rindu bejalai ba luar rumah sereta nginti

• Lebuh iya nyadi soldadu, iya berengkah berundingka tuju pengidup. Tu ngujungka iya enggau apai iya berengkah belajarka Bup Kudus. Iya dibaptisa kena taun 1997. Kena taun 1998 iya jadi enggau bini iya Viktoriya. Seduai iya bisi seiku anak indu ke agi besekula

Piak ti bekuasa di Rusia ngepunka kes jenayah kena bepecharaka Menyadi Igor Tsarev kena 30 Julai 2019. Iya dituduh belajarka Bup Kudus “ngambika ulih ngajar utai ke dipechaya Saksi-Saksi Jehovah ngagai orang bukai.” Bala pegawai Federal Security Service (FSB) belalai ngerikut utai ke nyadi ba gempuru Saksi-Saksi Jehovah, lalu mantaika video nya ba kot nyadika bukti kena nuduh Igor. Siti utai ti nyelai pasal kes tu, penawa minta kes tu enda dipechara ba mua orang mayuh. Nitihka jaku penawa nya empu, enti sema orang bukai dikemendarka datai ke kot lalu ningaka kes tu, sida nyangka dibai Igor pechayaka utai ke dipechaya iya, lalu sida empu engka deka nyadi Saksi-Saksi Jehovah mega. Tu meh kebuah iya minta kot nagang orang bukai ari datai, lalu kot pan nerima peminta iya.

Ku Igor madah: “Enda lama agi, pemutus ke deka digaga kot tu deka ngubah pengidup aku. Iya ke amat, kes tu sigi udah ngubah pengidup aku. Aku udah ga ditagang ari bejalai ke endur bukai. Ba endur aku gawa, aku pan patut nerangka ngagai tuke aku kebuah piak ti bekuasa nyerang aku. Tuke aku, enggau orang ke sama enggau aku gawa, enda meretika kebuah aku diperinsa baka tu, tang indah sida pan ngaku orang Kristian tetap seruran napi pemerinsa.”

Kitai besampi ke Igor enggau sida sebilik. Kitai nemu Jehovah deka ngeringka ati sida ‘ngena kuasa ulih roh Iya.’—Epesus 3:16.