Enda lama agi, Kot Pelilih Metallurgichesky ba Chelyabinsk deka madahka jaku gerah pasal kes Menyadi Valentina Suvorova. a Penawa apin madahka ukum ke dipinta iya beri ngagai Valentina.

Valentina Suvorova

• Ada: 1948 (Sorovskoye, Begian Kurgan)

• Biograpi: Udah badu kereja. Sebedau tu, iya gawa nyadi pengajar ba Sekula Musik Chelyabinsk pengelama 30 taun. Rindu bekebun, betanda sereta ningaka musik

  Kena taun 1973 iya jadi enggau Vladimir. Beberapa taun suba, anak lelaki seduai iya, Igor, mati laban penyakit riman. Baru-baru tu, indai enggau menyadi indu iya pan udah nadai

Kena 26 Mac 2019, bala polis ke bepegai senapang nyerungkai lebih ari 20 buah rumah menyadi kitai ba Chelyabinsk enggau Yemanzhelinsk. Pengudah diperesa bebulan-bulan, nyau kelama Valentina dituduh ngereja pengawa jenayah kena 5 Disember 2019. Diatu, umur iya 73 taun. Iya didawa ketegal macha Bup Kudus sereta bejaku enggau orang bukai pasal pengarap iya. Ke diatu, iya disekat ari bejalai ke endur bukai. Laki iya Vladimir mega dituduh ngereja jenayah ketegal pengarap Kristian iya.

Valentina ngenang baru utai ke nyadi lebuh bala pegawai polis ke bebaika senapang nyerebu rumah iya maya seduai iya benung tinduk. Ku iya: “Kami enda disagi masu mua, nyugu buk tauka ngerasukka baju. Sida ngelinggi kami, begigaka utai ba sebarang alai di rumah kami, sereta muka tiap lachi, jemari, sarang barang kemas, kerepai enggau kuchik.  . . . Sida ngiga dalam periuk kami, indah meresa tirei sereta semua pua enggau antap tilam kami. Semua barang kami abis diperesa sida.”

Ketegal Valentina udah tuai sereta bisi sekeda penanggul ba pengerai, iya irau, kati sakal ke ditapi iya tu deka ngachau pengerai iya.

Valentina nerangka, belajarka Bup Kudus enggau tetap udah nulung iya mengkang kering ba pengarap. Ku iya: “Macha ayat ari Meresa Ayat Bup Kudus Ninting Hari, belematika utai ke dibacha aku sereta ngereja utai ke dipelajar udah nulung aku betan natka penusah.”

Valentina nambah, ba maya ti ngirauka ati, iya ulih betan ketegal nyediaka diri lalu datai gempuru, enggau belajarka Bup Kudus kediri empu sereta enggau diri sebilik. Ku iya: “Aku belajarka penemu baru ba tiap iti gempuru, lalu aku nguji ngereja utai nya ba pengidup aku.” Iya mega ngaku, sampi amat ngelantangka ati iya. Ku iya: “Aku seruran meri terima kasih ngagai Petara ke tulung Iya.”

Kelimpah ari nya, Valentina seruran ngingatka diri empu enggau orang bukai munyi tu: “Kitai enda ibuh takutka sebarang utai. Bediri tegap ba pengarap, lalu kingatka ayat ba Matthew 6:33 enggau 2 Korint 1:3, 4.”

Endang nyata bala menyadi kitai ba Rusia, nyengkaum Valentina seduai Vladimir, ngamatka ayat ba Masmur 64:10 ti madah: ‘Semua orang ke lurus deka rami gaga ketegal utai ti udah dikereja Jehovah. Sida deka diau likun dalam Iya. Semua orang ke badas deka muji Iya.’