Kena 25 September 2020, a Kot Menua Yelizovsky ba Begian Kamchatka deka madahka pemutus kes Menyadi Konstantin Bazhenov, bini iya ke benama Snezhana, enggau Menyadi Indu Vera Zolotova. Piak bedawa minta Konstantin enggau bini iya Snezhana, mayar ganti rugi penyampau 600,000 rubles ($7,850 U.S. tauka RM32,700), lalu 400,000 rubles ($5,235 U.S. tauka RM21,800) Ngagai Menyadi Vera.

Konstantin Bazhenov

• Ada: 1977 (Petropavlovsk-Kamchatsky, Begian Kamchatka)

• Biograpi: Ari empat iku semadi, iya meh ke pemadu tuai. Iya kala gawa nyadi mekanik sereta pengajar ba kolej. Iya minat nginti

• Kena taun 2001 iya jadi enggau Snezhana, seiku pengajar mega. Seduai iya bisi seiku anak indu benama Elizabeth. Sida sebilik sama nyembah Jehovah

Snezhana Bazhenova

• Ada: 1977 (Pulau Shikotan, Sakhalin Oblast)

• Biograpi: Dibesaika dalam ruang bilik tunggal. Iya sayauka anak mit, sereta rindu gawa ngajar anak mit ba sekula rendah. Diatu, nyentukka kes jenayah iya dipechara, iya enda dikemendarka nyadi pengajar anak mit agi

• Ini iya kala ngajar iya pasal Petara sereta chara besampi. Tu ngasuh iya rinduka Petara sereta minat macha Bup Kudus

Vera Zolotova

• Ada: 1946 (Yelizovo, Begian Kamchatka)

• Biograpi: Iya dibesaika ba ruang bilik ti besai. Kena taun 1966, iya jadi enggau Yuri Zolotov. Seduai iya bisi dua iku anak. Suba iya gawa nyadi akauntant, tang udah badu kereja. Iya rindu sukan niki bukit, bemain ski, sereta lunchur ais

• Pengelama betaun-taun iya nguji deka ngelala Petara. Iya mansik mayuh bengkah pengarap. Nyau kelama iya nemu Petara endang lurus sereta rinduka orang. Laki iya nadai kala sepengarap enggau iya, tauka nyadi seiku Saksi. Taja pia, iya rindu meda chara ajar Bup Kudus udah ngemanahka agi pengidup bini iya

Kena 19 Ogos 2018, bala polis nyelungkai tiga buah rumah alai bala Saksi diau ba nengeri Yelizovo. Ke pengujung iya 11 iku menyadi lelaki enggau indu ditangkap. Sida lalu ditasat bejam-jam. Nyau kelama, 8 iku ari sida dilepaska, tang piak Polis bedawaka Menyadi Konstantin, bini iya, sereta Menyadi Vera. Sida tiga iku lalu ditan ba endur ngetanka orang tangkap enda lama aja. Pengudah dua hari, Snezhana seduai Vera dilepaska. Seiku hakim mutuska Menyadi Konstantin patut terus ditan, lalu iya dilepaska lapan hari pengudah nya.

Seraya kitai nganti pemutus kes sida, kitai besampi awakka Konstantin seduai Snezhana sereta Menyadi Vera sama bela terus manggaika pengarap ngagai Jehovah. Bup Kudus ngasuh kitai andal, Jehovah deka ‘ngemenuhka [sida] enggau semua pengaga enggau pemaik ketegal pengarap [sida], ngambika ulih kuasa roh kudus [sida] penuh laban pengadang.’—Rome 15:13.