Kena 18 Februari 2021, Kot Pelilih Birobidzhan ba Jewish Autonomous Region meri ukum jil ke ditangguh enggau pemanjai dua taun setengah ngagai Menyadi Konstantin Guzev. Ke diatu, iya enda dijil.

Konstantin Guzev

• Ada: 1964 (Khabarovsk)

• Biograpi: Lebuh agi mit, apai iya pemabuk sereta amat kasar. Iya suah berundingka nama reti pengidup. Ketegal asa ati, iya berengkah salah guna ai bisa enggau dadah. Nyau kelama iya berengkah belajarka Bup Kudus enggau Saksi-Saksi Jehovah. Saut ari Bup Kudus ke ditemu iya ngemuaska ati iya. Iya ngaga ubah ti besai ba pengidup lalu dibaptisa kena taun 2000. Kena taun 2001 iya jadi enggau bini iya Anastasiya

Kena bulan Mei 2018, piak ti bekuasa bejalaika operasi ke dikumbai sida “Hari Pechara.” Bisi 150 iku pegawai polis ke nyelungkai rumah bala menyadi ba nengeri Birobidzhan, nyengkaum rumah Menyadi Konstantin. Kena 29 Julai 2019, piak ti bekuasa ngepunka kes jenayah ngelaban Konstantin. Ketegal iya ngiring gempuru Kristian, iya dituduh “ngatur pengawa ke gerempung ekstremis.”

Ba Birobidzhan, bisi 19 kes jenayah ke ngelaban 22 iku Saksi-Saksi Jehovah, nyengkaum kes bini Konstantin empu, Anastasiya.

Konstantin seduai Anastasiya dikeringka ulih teladan menyadi bukai ba Rusia ti ngayanka pemerani. Konstantin madahka: “Aku empu udah meda sekeda menyadi indu, keterubah iya madahka diri enggai bejaku di mua bala ba kot. . . . Tang enggau saup ari Jehovah sereta sampi menyadi bukai, indah sida pan nyadi landik sereta berani ngetanka pengarap diri.”

Kitai berundingka sereta besampika semua bala menyadi kitai ba Rusia. Kitai andalka, laban Jehovah bisi enggau sida, nadai pelan kena nyerang sida tauka ngelemika pengarap sida deka mujur.—Isaiah 8:10.