Kena 12 Februari 2021, Kot Pelilih Birobidzhan ba Jewish Autonomous Region madahka jaku gerah pasal kes Menyadi Larisa Artamonova. Taja pan piak bedawa minta iya dijil pengelama enam taun, tang ke pengujung iya, iya didenda mayar 10,000 rubles (tauka RM545).

Larisa Artamonova

• Ada: 1970 (Birobidzhan, Jewish Autonomous Region)

• Biograpi: Lebuh iya beumur tiga taun, apai iya mati dibunuh. Iya kala gawa ba bakeri, nyadi pelukis grafik sereta tukang jait. Iya kawin kena taun 1990. Iya bisi seiku anak lelaki ke benama Yevgeniy lalu napi penyakit ti balat, ke jarang nyadi. Iya empu mega napi siti penyakit ke nyerang buku tulang iya. Taja pia, iya agi aktif, bebasikal, lunchur ais, bemain ski sereta ngelukis potrait

  Ketegal iya irau pasal pengawa ti enda lurus, pemerinsa enggau penyai, iya ka belajarka Bup Kudus enggau Saksi-Saksi Jehovah. Saut ari Bup Kudus ngemuaska ati iya, lalu iya dibaptisa kena taun 1995

Kena 25 September 2019, piak ti bekuasa ngepunka kes jenayah ngelaban Menyadi Larisa Artamonova. Anak lelaki iya mega dituduh ba kes ke bukai. Seduai iya entara 22 iku Saksi ba Jewish Autonomous Region ke dituduh ngereja pengawa ekstremis.

Lelaki ke udah munuh apai Larisa suba dijil pengelama enam taun ketegal jenayah ke dikereja iya. Indai enggau apai tiri Larisa amat tekenyit, laban Larisa nyau ka nerima ukum ti sama enggau jenayah nya, semina ketegal pengarap iya.

Empai lama sebedau sakal tu balat nyadi ba Birobidzhan, Larisa enggau anak lelaki iya berengkah ransing agi ba pengawa ke Jehovah. Ku iya madah: “Enti nuan kisuk ba pengawa ke Jehovah, sereta ngeringka pengarap diri enggau pengarap diri sebilik, nadai utai ulih ngenakutka nuan. Sitan nguji ngasuh sida ke nyakal, ngemba kitai. Iya arapka kitai deka nyimpulka, pengawa ke Jehovah deka ngujungka kitai enda bibas agi. Iya ke amat, Jehovah madahka kitai, kitai semina ulih bibas enti kitai terus ngereja utai ti diasuh iya kereja kitai.”

Semua sida ke 22 iku menyadi ari Birobidzhan ke udah dituduh, andalka diri udah ngerinduka ati Jehovah ketegal mengkang taluk ngagai Iya. Sida endang nyaut tuduh Sitan ngagai Jehovah.—Jaku Dalam 27:11.