Kena 7 April 2020, opis Piak ti Bedawa Belarus nulak peminta ari menua Rusia kena nganjung Menyadi Nikolay Makhalichev pulai ke Rusia. Pengujung iya, sida mutuska ngelepaska iya ari rumah jil. Menyadi Makhalichev chukup gaga ati laban iya bibas lalu sempat enggau orang ngintu pengawa Ngingatka Pemati Jesus begulai enggau bala kaban iya ba Belarus.

Piak ti bekuasa nangkap Menyadi Makhalichev kena 21 Februari 2020 lebuh iya benung bejalai ari Rusia, nuju ke Belarus, maya iya nemuai ngagai bala kaban iya ba din. Polis ngetan menyadi kitai ba balai polis pengudah sida meresa passport iya lalu tetemuka nama iya ba lis orang ke digiga Rusia, ketegal iya dituduh ngatur pengawa gerempung ke dikumbai “ekstremis”.

Pengudah tiga hari, sida mutuska, iya patut dijil seagi kes iya ditasat, sereta nganti pemutus sekalika iya patut dianjung pulai ke Rusia tauka enda. Nya alai, iya deka dipechara bepelasarka kes iya ke dituduh kenyau ari Januari 2019. Tu meh kali keterubah seiku ari Saksi-Saksi Jehovah ditangkap ba menua bukai ketegal surat begigaka penjenayah ari Rusia.

Lebuh Menyadi Makhalichev ditan, iya mengkang gaga ati laban iya neruska sembah iya ngagai Jehovah. Dalam bulan Mac, iya udah bejalaika empat iti pelajar Bup Kudus enggau orang bukai, sereta bulih jam nginjil penyampau 198 jam.

Kitai andal, bala menyadi kitai di Rusia deka mengkang bepanggai ba Jehovah ke nyadika penyaga sida maya napi penusah.—Masmur 142:5.