Pemutus ngagai kes Menyadi Roman Markin enggau Viktor Trofimov, dijangka deka diapil baru kena 22 Januari 2020. Orang ke bedawa, minta sida abis nadai dijil pengelama enam taun setengah.

Kes seduai iya berengkah kena 8 April 2018, lebuh rumah sida ba Polyarny Rusia diabas enggau ngenyit, ari piak bekuasa ke bekenaka tuping mua sereta senyata. Bala polis nya datai ngagai rumah Menyadi Markin maya laun malam, lalu mechahka pintu rumah iya. Sida lalu nuatka senyata ngagai Menyadi Markin, lalu mejal iya ningkap ke lantai, seraya sida meresa rumah iya. Anak indu Menyadi Markin ke beumur 16 taun mega ningkap ke lantai, lalu ngengkahka lengan iya ba atas pala.

Ba malam ti sama, empat buah da agi rumah Saksi ke bukai diabas enggau ngenyit ba Polyarny. Mayuh bala menyadi, nyengkaum Menyadi Markin enggau Trovimov, dibai ngagai balai lalu ditasat. Kot menua Polyarny di Murmansk mutuska, Menyadi Markin enggau Trovimov ditan sebedau kes seduai iya diapil. Kena 7 Februari 2019, kot ngelepaska seduai iya ari ditan ba rumah. Tang sebedau pemutus kes seduai iya pansut, pengawa seduai iya sigi udah ditagang, nyentukka seduai iya tusah deka kini-kini tauka begigaka sesapa.

Nyentukka diatu, nyauka 300 iku Saksi-Saksi Jehovah ba Rusia dituduh penjenayah. Aram meh kitai besampika sida, ngambi sida mengkang berani sereta kering. Arapka sida ulih terus andal, nadai utai ulih nyeraraka sida ari pengerindu Jehovah.—Rome 8:38, 39.