Kena 30 Julai 2021, Kot Pelilih Birobidzhan ba Jewish Autonomous Region ngumbai Menyadi Nataliya Kriger besalah. Kot nya meri ukum jil pengelama dua taun setengah ti ditangguh.

Nataliya Kriger

• Ada: 1978 (Khabarovsk)

• Biograpi: Lebuh agi mit, indai Nataliya nadai. Iya dibesaika ba rumah anak patu. Lebuh iya beumur enam taun, iya pindah ngagai Amurzet, Rusia, enggau penyauh 400 kilometer (248 batu.) Dia, iya diau enggau ini, ibu enggau petunggal iya ke udah nyadi Saksi-Saksi Jehovah. Iya gawa nyaga orang tuai

• Kena taun 1999 iya dibaptisa nyadi seiku ari Saksi-Saksi Jehovah. Kena tuan 2017, iya jadi enggau laki iya Valeriy. Seduai iya rindu betanda, berakit sereta sukan niki bukit

Kena Mei 2018, piak ti bekuasa Rusia nyerungkai rumah sida Nataliya sebilik sereta rumah bala menyadi ke bukai. Piak ti bekuasa ngumbai tu “Operasi Hari Pechara.” Udah nya, piak ti bedawa ngepunka kes jenayah ngelaban Valeriy. Kena 6 Februari 2020, sida mega ngepunka kes jenayah kena bepecharaka Nataliya. Ba maya nya bisi mega lima iku menyadi indu ke bukai ke dituduh ngereja jenayah.

Kelimpah ari napi penguji tu, Nataliya pan benung tusah ati laban ini iya udah nadai kena Februari 2020. Sebedau nya, iya udah ngibun ini iya pengelama enam taun.

Utai ke nulung Nataliya betan iya nya kaul ti tegap enggau Jehovah. Ku iya nerangka: “Lebuh aku besampi ke orang bukai, tu nulung aku enda kelalu betatika penanggul diri. Ketegal penguji tu, aku ngasaika Jehovah semak agi ngagai aku, lalu Iya tampak agi ba pengidup aku. Aku udah meda iya nyaut sampi aku sereta nyukung aku.”

Nataliya suah ngenang pasal kebuah iya ulih andal, Jehovah deka terus nyukung iya. Ku iya: “Ayat ba Masmur 94:19 ngeringka aku. Dia madah, ‘Nuan merindang aku, lalu ngasuh ati aku gaga.’ Bisi mayuh chunto ari jeman kelia, sereta kemayaharitu, ti nunjukka nembiak Petara ti berani ulih betan natka mayuh macham pemerinsa. Lebuh aku belematika teladan sida, nya pan ngeringka aku.”