Kena 4 Jun 2021, Menyadi Nikolay Aliyev diberi ukum jil pengelama empat taun setengah ti ditangguh, ari Kot Pelilih Komsomolsk-on-Amur.

Nikolay Aliyev

• Ada: 1978 (Komsomolsk-on-Amur)

• Biograpi: Lebuh agi mit, iya berunding pasal pun penatai pengidup enggau dunya raya. Tu ngujungka iya ngiga saut ke tanya iya dalam Bup Kudus. Iya kala main sukan ti ganas. Tang iya badu agi pengudah iya belematika ajar sereta teladan Jesus ti deka bebaik enggau semua orang. Iya dibaptisa nyadi seiku Saksi kena taun 1993

  Iya jadi enggau bini iya Alesya kena taun 2016. Seduai iya rindu raun ke menua bukai, sukan niki bukit sereta bemain ski

Kena tumu pagi, 22 Mei 2020, bala polis nyerungkai rumah Nikolay seduai Aleysa ba nengeri Komsomolsk-on-Amur. Lebuh sida nyerebu tama rumah, sida malu Nikolay lalu iya rebah. Dalam timpuh lima jam sida nyerungkai rumah seduai iya lalu udah nya nangkap seduai iya. Lebuh seduai iya ditasat, penasat nya meransang Nikolay nukar pengarap iya ngagai pengarap ti dipegai orang mayuh ba Rusia. Sida mega ngasuh Alesya bekerejasama enggau piak ti bekuasa, enggai ke “utai jai” nyadi ba laki iya. Taja pan balat diemba lebuh ditasat, seduai iya lalu dilepaska lemai nya lalu diasuh pulai ke rumah diri.

Nikolay ngenang baru pemayuh chara Jehovah nulung iya ba maya ti tusah tu, lalu nya meri iya pengering. Ku iya nerangka: “Lebuh nuan dituntung penusah, baru nuan sedarka diri enda ulih napi nya kediri aja. Aku empu nyau meda enggau terang agi chara Jehovah nyaut sampi aku sereta ngiring aku. Aku setuju enggau jaku Paul ti madah: ‘Lebuh aku lemi, aku kering.’”—2 Korint 12:10.

Nikolay seduai Aleysa seruran ngiga chara kena ngemansangka pemerani sereta enda kelalu irau. Seduai iya nyelak ayat Isaiah 41:10 lalu ngelekatka nya ba peti ais sida. Ku Nikolay nerangka: “Lebuh penusah aku majak nambah, aku macha ayat nya, lalu tu nulung aku napi penusah nya. Ayat tu nulung aku enda takut. Utai ke ngeringka aku ari ayat tu, Jehovah besemaya deka meruan ngimbai aku. Iya amat semak aku, baka ke Iya kaban rapat ti merap aku.” Kitai andalka Jehovah deka seruran ngeringka nembiak Iya ti tetap ati.