Kena 19 Disember 2020, Kot Pelilih Khostinskiy ba Sochi, Rusia, meri pemutus ngumbai Menyadi Nikolay Kuzichkin seduai Vyacheslav Popov besalah. Nikolay diberi ukum jil pengelama setaun sebulan, lalu Vyacheslav diberi ukum jil pengelama setaun sepuluh bulan. Tang, ketegal seduai iya udah lama ditan nganti kes sida dipechara, timpuh alai sida ditan udah dikira, nya alai sida enda ibuh dijil agi. Vyacheslav agi ditan, tang iya deka dilepaska sekali pemutus kot nya dipejalaika. Sebedau tu, Nikolay udah ditan ba rumah iya empu tang diatu iya udah bibas.

Nikolay Kuzichkin

• Ada: 1951 (Begian Kostroma)

• Biograpi: Pengudah tembu belajar ba sekula musik, iya gawa nyadi orang ke ngaduka tiun piano. Iya enggau bini iya Olga udah ngemesaika tiga iku anak lelaki. Iya mega landik ngaga akaun

  Kena pun taun 1990-an, iya berengkah belajarka Bup Kudus enggau Saksi-Saksi Jehovah. Ketegal meda jaku benabi dalam Bup Kudus dikeamatka, iya diperansang nyerahka diri lalu dibaptisa kena taun 1993

Vyacheslav Popov

• Ada: 1974 (Tomsk)

• Biograpi: Kenyau ari mit iya landik ba seni lalu kereja iya nya ngelawaka gaya bengunan. Iya betemu enggau bini iya Yuliya, lebuh seduai iya agi belajar ba kolej. Seduai iya jadi kena taun 1998 lalu bisi seiku anak indu enggau dua iku anak lelaki. Sida pindah ngagai Sochi kena taun 2010. Sida sebilik rindu bemain ski sereta raun ke pantai

  Yuliya dulu agi belajarka Bup Kudus enggau Saksi-Saksi Jehovah. Pengudah apai Vyacheslav nadai, iya bulih pengelantang ari ajar Bup Kudus. Iya dibaptisa kena taun 2004

Kena lemai 10 Oktober 2019, beberapa raban pegawai piak bekuasa ke bepegaika senyata sereta ngemai ukui, nyerungkai 36 buah rumah Saksi-Saksi Jehovah ba Sochi, Rusia.

Menyadi ke biak enggau ke tuai bela dipejal ningkap ba lantai seraya rumah sida diserungkai. Piak ti bekuasa ngerampas talipun binching, tablet, komputer, litaricha, bup nota indah surat. Bisi sekeda kes alai pegawai nya empu belalai ngengkahka litaricha ke ditagang perintah Rusia dalam rumah menyadi, ngambika nya ulih “ditemu” lebuh sida nyerungkai rumah. Ketegal tu, Menyadi Nikolay Kuzichkin seduai Vyacheslav Popov ditangkap. Ba hari siti seduai iya ditan nganti kes sida dipechara.

Menyadi Nikolay napi mayuh bengkah penyakit ti raya. Iya udah mayuh kali minta diri diperesa lutur, tang pegawai kot nulak peminta iya laban ku sida, penyakit iya nadai ba “lis penyakit ke ngasuh orang enda tau dijil.” Sil alai Nikolay ditan kelalu mit ke penyampau orang jil ke ditan dia, lalu sekeda ari sida nginsap. Tu ngasuh gaya pengerai Nikolay majak enda manah.

Taja pan utai ke ditapi Nikolay dalam rumah jil ulih ngachau nyawa iya, iya madah: “Ditan ba rumah jil sempama diperesa ngena X-ray. Lebuh diskan enggau X-ray, kitai ulih meda nama utai ke bisi dalam tubuh. Lebuh ditan ba jil, kitai ulih meda sekalika seseiku orang ngembuan kualiti Kristian tauka enda.” Ari ke berundingka diri empu aja, lebuh Nikolay dijil semua orang ngelala iya laban iya diau bebaik enggau orang bukai sereta manah ati, indah iya bebendar deka nulung orang jil ke bukai ke napi penyakit depression (kemurungan) tauka deka munuh diri.

Pengudah timpuh iya ditan dikemanjaika enam kali, kena 22 April 2020 Nikolay dipulaika ngagai rumah diri lalu ditan ba dia. Maya nya iya amat lemi nyentukka iya nyau enda ulih bediri agi. Nya baru iya dikemendarka berubat.

Timpuh Menyadi Vyacheslav ditan pan dipanjaika 14 kali. Reti nya, iya diseraraka ari ruang bilik iya pengelama lebih setaun.

Kitai beterima kasih ngagai Nikolay enggau Vyacheslav ketegal netapka teladan ti manah ba pengarap enggau pengeran deka ngetanka hak Jehovah merintah. Sida endang idup sejalai enggau Masmur 16:8 ti madah: ‘Aku seruran nemu Jehovah bisi enggau aku. Iya semak aku, lalu nadai utai ulih ngelebuka aku.’