Kena 17 Disember 2020, a Kot Pelilih Leninskiy ba Rostov-on-Don deka madahka pemutus ba kes Menyadi Ruslan Alyev. Penawa udah minta kot meri Ruslan rikut kena ukum jil pengelama tiga taun, tang enda amat ngetan iya ba jil.

Ruslan Alyev

• Ada: 1987 (Chunoyar, Begian Krasnoyarsk)

• Biograpi: Lebuh iya dibesaika, ruang bilik iya suah pindah rumah, lalu bisi diau ba Azerbaijan sereta Ukraine. Iya kala gawa nyadi tukang nirika rumah, jurujual, pengajar gitar, sereta pengajar jaku English enggau jaku China. Iya rindu besukan sereta nuliska pantun enggau lagu. Iya landik bejaku empat bansa jaku. Bini iya Kristina mega pandai jaku China

  Iya berengkah macha enggau belajarka Bup Kudus kenyau ari umur 13 taun. Majak iya belajarka Bup Kudus, majak iya sedar bup nya ngundan saut ngagai semua tanya iya pasal pengidup. Nya kebuah iya mutus ati nyerahka diri ngagai Petara lalu dibaptisa kena taun 2006

Kena 6 Jun 2019, piak bekuasa ngepunka kes jenayah ti nuduh Menyadi Ruslan Alyev besalah. Asil iya, Menyadi Ruslan ditan kena 10 Jun 2019. Pengudah ditan pengelama 24 jam, Menyadi Ruslan enggau seiku da agi menyadi lelaki, iya nya Semyon Baybak, ditan ba rumah sida empu. Keterubah iya, kot mutuska Ruslan patut ditan ba rumah pengelama lapan minggu. Tang timpuh iya ditan udah ditambahka lama agi. Ke pengujung iya, Menyadi Ruslan udah ditan dalam rumah iya pengelama 18 bulan. Seagi iya ditan ba rumah diri, iya ditagang ari begulai enggau sebarang orang kelimpah ari luyar iya, dua iku ari piak bekuasa sereta bini iya. Iya pan ditagang ari ngena internet tauka ngirum tauka nerima sebarang surat tauka SMS.

Indah sebedau iya ditangkap, Ruslan seduai bini iya Kristina suah berandau pasal sakal enggau pemerinsa tu endang patut disadang. Ku iya nerangka, “Kami nguji macha Bup Kudus, datai begempuru sereta besampi enggau tetap. Ari macha bup Yearbook sereta cherita pengidup bala menyadi, kami sigi udah nemu pasal sakal. Pia mega, kami pan nemu bala menyadi ulih ngembuan runding ti positif sereta enda lemi semengat indah lebuh balat diperinsa. Kami minta Jehovah ngeringka kami kena napi penguji ti deka datai.”

Ruslan mega bulih penguntung lebuh iya bejaku enggau menyadi bukai pasal pemerinsa ti deka ditapi sida. Iya madah: “Ngambika ulih nulung sereta meransang bala menyadi ba eklisia, aku mansik ayat Bup Kudus enggau aritkel ti meransang ari litaricha kitai ti ulih dikunsi enggau sida. Tang, lebuh aku empu begunaka jaku peransang enggau pengering, ayat Bup Kudus enggau artikel ke kala digiga aku deh ke meransang aku.”

Ruslan seduai Kristina ngasaika penguntung ketegal udah nyikap diri deka diperinsa. Lebuh rumah seduai iya diserungkai, iya madah: “Aku nyau nadai ngasaika pengirau maya nya.” Maya kes Ruslan benung diperesa, penasat nya nguji ngemba Kristina, madahka iya pan deka dituduh. Ruslan ngenang: “Bini aku Kristina enda takut ke jaku emba iya. Nya amat meransang sereta ngeringka aku.”

Ketegal iya ditan ba rumah, Ruslan enggau bini iya napi mayuh penanggul. Tang Ruslan nerangka, “Baka ke dijangka aku, Jehovah seruran ngereja utai ba maya ti ngena ngambi ulih nyaga aku ba fisikal, emosi sereta ba pengarap. Kami duai udah lama belajar manggaika pengarap ba Iya sereta idup enggau penumbas iya. Ketegal nya, kami enda kelalu irau.”

Bisi sekali lebuh kot deka mutuska sekalika deka ngemanjaika timpuh Ruslan ditan ba rumah. Bala kaban iya enda disagi tama dalam kot sehari nya. Taja pia, bala menyadi kitai begelumu ba luar bengunan kot, lalu lebuh iya pansut ari bengunan nya sida nempapka jari sereta manjung enggau inggar: “Ruslan, kami bisi enggau nuan!”

Kitai endang beterima kasih ke teladan ti manah ari bala menyadi kitai ba Rusia. Sida diperinsa taja pan sida enda besalah, tang sida tetap manggaika pengarap sida ngagai Jehovah.—Masmur 118:6-9.