Kena 18 Disember 2020, a Kot Pelilih Leninskiy ba Rostov-on-Don deka meri jaku gerah pasal kes Menyadi Semyon Baybak. Penawa udah minta kot meri ukum pengelama empat taun ngagai Menyadi Semyon. Enti ukum nya diberi, Menyadi Semyon enda ibuh dijil seagi iya ngasika sekat ke diberi ngagai iya.

Semyon Baybak

• Ada: 1997 (Rostov-on-Don)

• Biograpi: Bisi seiku abang enggau seiku kaka. Iya udah belajar jaku China sereta nyadi pengajar jaku China. Iya rindu macha sereta nulis pantun

• Iya belajar pasal Jehovah ari apai indai iya kenyau ari mit. Lebuh iya mansang besai, iya berengkah meretika jaku ajar dalam Bup kudus lalu deka nitihka nya ba pengidup. Ketegal pengarap iya, lebuh iya dikangau nyadi soldadu, iya nulak. Entara taun 2015 enggau 2017, iya diasuh ngereja pengawa bukai ari ke nyadi soldadu. Maya nya, iya nyadi tukang nuchi ba sepital alai anak mit diubat

Kena 22 Mei 2019, bala pegawai ari piak ti nagang pengawa ekstremis nyelungkai 13 buah rumah bala Saksi ba Rostov-on-Don. Dua minggu udah bekau nya, Menyadi Semyon dituduh ngereja pengawa jenayah. Iya lalu ditangkap sereta ditan dalam sehari ba siti sil, nyentukka kot mutuska iya patut ditan ba rumah. Keterubah iya, iya deka ditan pengelama lapan minggu, tang timpuh nya udah dikemanjaika tujuh kali.

Ba pun kes iya suba, Menyadi Semyon dituduh ngereja pengawa “jenayah” ketegal iya datai begempuru sereta bekunsika utai ke dipelajar iya ari Bup Kudus enggau orang bukai. Udah nya, kena November 2019, piak bedawa nambahka tuduh iya nya, meri duit kena nyukung gerempung ti “ekstremis.”

Seraya pemerinsa tu ditapi bala menyadi kitai ba Rusia, kitai andalka Jehovah, ‘Petara ti pun pemaik,’ deka nyikap sida ngambika sida “ulih ngereja peneka Iya.”—Hebrew 13:20, 21.