Kena 24 November 2020, Kot Nengeri Petropavlovsk-Kamchatskiy ba Begian Kamchatka ngumbai Menyadi Sergey Ledenyov udah ngereja pengawa jenayah. Taja pan iya diberi ukum jil pengelama dua taun, iya enda ibuh dijil seagi iya nitihka sekat ke diberi ngagai iya. Pengudah timpuh nya, dalam tiga taun da agi, iya agi deka disekat ba sekeda utai.

Ba hari ti penudi kes iya dipechara ba kot, Sergey enggau berani madahka pasal pemesai reti nyadi seiku ari Saksi-Saksi Jehovah. Ku iya: “Nama ‘Jehovah’ ukai dituju ngagai seraban orang, siti gerempung, tauka siti pengarap. Jehovah meh nama Petara empu. Dalam Bup Kudus, ba bup ke ditulis nabi Isaiah, Jehovah madah nembiak Iya dikumbai ‘saksi Aku.’ Kena taun 1931, kami belabuh dikumbai ‘Saksi-Saksi Jehovah’ laban nama nya bepelasarka ayat ari Isaiah tu tadi. Nama kami tu nerangka pasal pengawa kami, iya nya besaksi pasal Petara, lalu madahka orang bukai Jehovah meh Penempa, Penyelamat sereta Raja Besai di serata dunya raya. Kami mega enda tau enda madahka orang pasal tuju Iya ke mensia ti ngalitka ati. Aku enggau bala menyadi Kristian aku ngumbai tu basa ti chukup besai.”—Isaiah 43:10.

Enggau ati ti andal, Sergey madahka kot nya: “Aku nadai kebuah berasai malu, laban aku endang enda besalah. Ati aku beresi di mua Petara enggau mensia.”