Kena 24 November 2020, a Kot Nengeri Petropavlovsk-Kamchatskiy deka madahka jaku gerah pasal kes Menyadi Sergey Ledenyov. Iya engka deka diberi ukum jil pengelama enam taun.

Sergey Ledenyov

• Ada: 1974 (Ossora, Begian Kamchatka)

• Biograpi: Iya bisi lima iku menyadi. Iya rindu ngelukis sereta begambar ngena kamera. Iya gawa nirika rumah, nyengkaum nudukka batu bata enggau tile. Sebedau belajarka Bup Kudus enggau Saksi-Saksi Jehovah, iya ngumbai bup nya enda sejalai enggau sains sereta bup ti kelalu lama. Iya jadi enggau bini iya Anna ba taun 2017. Anna madahka, laban Sergey nitihka jaku lalau ari Bup Kudus, iya nyadi laki ti manah, nelap sereta ngayanka pengerindu

Kena 2 Disember 2018, seraban polis ke bepegaika senyata sereta nutup mua diri, tama dalam rumah menyadi Sergey ba Petropavlovsk-Kamchatskiy. Iya ditangkap lalu dituduh ngelanggar undang-undang Rusia lumur 282.2. Kes iya berengkah dipechara kena 28 November 2019.

Kena 12 Disember 2019, Kot Nengeri Petropavlovsk-Kamchatskiy ba Begian Kamchatka mulaika kes nya baru ngagai penawa. Kesuah iya, tu nyadi enti kot ngumbai bisi penanggul ba kes nya, baka piak bedawa enda chukup bukti kena nuduh orang nya. Tang, kena 4 Februari 2020, siti kot ke tinggi agi nulak pemutus nya lalu belabuh bepecharaka kes nya baru. Pengudah nya, piak bekuasa nguji nasat bini Sergey enggau seiku agi menyadi indu, lalu nguji mejal seduai iya bula ngelaban Sergey. Menyadi Anna enggau menyadi indu ke bukai nya tetap enggai ngereja nya.

Bala kaban belayan Sergey ke ukai Saksi pan enda meretika kebuah iya diperinsa ketegal pengarap iya.

Kitai besampi ke Menyadi Sergey enggau bini iya, seraya sida nganti pemutus nya digaga. Kitai nemu, roh kudus Jehovah endang bisi enggau sida.—1 Peter 4:14.