Kena 1 Mac 2021, a Kot Pelilih Priokskiy ba Nizhny Novgorod engka deka meri jaku gerah pasal kes Menyadi Sergey Verkhoturov. Iya engka deka dijil pengelama tujuh taun.

Sergey Verkhoturov

• Ada: 1974 (Baikalsk, Begian Irkutsk)

• Biograpi: Suba, iya gawa nyadi orang ke nyambung wayar pengelama sepuluh taun. Baru-baru tu iya gawa ba siti kompeni ba begian undang-undang

• Kenyau ari biak, iya bisi minat pasal Bup Kudus. Lebuh iya udah tuai besai, seiku orang ke sama gawa enggau iya belajarka Bup Kudus enggau Saksi-Saksi Jehovah. Iya meratika pemanah ulah orang nya, lalu ke pengujung iya, iya pan ka belajarka Bup Kudus. Iya alit ati nemu ajar Bup Kudus bisi logik sereta mudah dimereti. Iya dibaptisa kena taun 1995. Kena taun 2001 iya jadi enggau bini iya Viktoriya

Kena 16 enggau 17 Julai 2019, piak ti bekuasa Rusia nyelungkai 35 buah rumah Saksi-Saksi Jehovah ba Begian Nizhny Novgorod. Maya nya rumah Sergey seduai Viktoriya pan diselungkai. Sergey ngenang utai ke nyadi lebuh rumah iya benung diselungkai: “Aku semina mimit aja irau.” Tang udah nya, bala pegawai ngemba iya, lalu madahka sida deka ngejil bini iya Viktoriya enti Sergey enda madahka sida penerang ke deka ditemu sida. Sergey madah: “Nya amat ngenusahka aku.” Enggau saup ari Jehovah, Sergey ulih mengkang taluk maya nya, lalu Viktoriya b pan enda nyadi dijil.

Sergey nerangka: “Ari tu aku belajar, aku enda patut takutka utai ti apin nyadi, laban ke suah iya, semua utai enda nyadi baka ke disangka nuan. Lebuh nuan benung ngasaika sesiti penguji, orang bukai ke meda engka ngumbai penguji nya enda ulih ditatka nuan. Tang nuan empu deka ngasaika sukung Jehovah lebuh napi penguji, enggau chara ti amat spesial.”

Ngambika mengkang gaga ati, Sergey ngereja mayuh utai ke Jehovah sereta orang bukai. Ku iya: “Tu meh kengka pengingin aku ba pengidup—awakka Jehovah ngemuliaka diri. Aku seruran besampi pasal pekara tu, lalu aku deka terus besampi munyi nya. Aku mega besampi ngambika aku ulih tan natka diri diperinsa enggau chara ti ngemuliaka nama Iya, sereta meri saksi ngagai orang bukai. Kenyau ari maya penguji aku berengkah, semua sida ke merinsaka aku enda nemu utai pasal Petara, tauka nemu mimit aja pasal Iya. Enggau pengabis ati aku minta Jehovah nulung sida belajar pasal Iya sereta nyadi pangan Iya.”

Seraya menyadi Kristian kitai ba Rusia napi pemerinsa tu, kitai pan setuju enggau utai ku rasul Paul, ti madah: ‘Awakka Petara empu, ke pun pemaik, seruran meri kita pemaik ngena semua macham chara. Awakka Petara meruan enggau kita semua.’—2 Tesalonika 3:16.