Kena 4 Februari 2020, Kot Zheleznodorozhniy menua Rusia deka madahka pemutus sida pasal kes Menyadi Stanislav Kim enggau Menyadi Nikolay Polevodov. Ukum ke deka diberi ngagai sida iya nya, tiga taun dijil ba rumah jil ti enda sama, ba endur kem ke diasuh gawa enggau kasar. Ukai nya aja. Dua iku menyadi lelaki tu mega dikumbai ngereja pengawa jenayah ari Kot Besai ke bukai, ba menua ti sama.

Menyadi Kim enggau Mneyadi Polevodov ditangkap kena 10 November 2018. Maya nya, lebih ari 50 iku bala menyadi ari bandar Khabarovsk nyiwa siti café, endur sida merindang diri. Sida nadai ngereja pengawa ke bekaul enggau gempuru. Enda lama sebedau pengawa sida nya berengkah, bepuluh iku polis datai, pia mega sida ke penyiasat mega tama lalu nangkap sida. Menyadi Kim enggau Polevodov, pia mega Menyadi Vitaliy Zhuk ditan pengelama dua bulan sebedau kes sida diapil. Sida ditan ba rumah beberapa bulan udah nya.

Menyadi Kim enggau Polevodov dituduh penjenayah laban seduai iya mega datai ba pengawa nya. Pemutus kes deka dipadahka kena 4 Februari tu. Seduai iya mega dituduh ba kes ke bukai, sama baka Menyadi Zhuk enggau tiga iku da agi menyadi bukai ke datai ba pengawa nya. Ba kes tu, Menyadi Kim enggau Menyadi Polevodov ke dituduh ngatur pengawa nya. Pemutus pasal kes kedua tu bedau temu kemaya deka diapil.

Utai ke nyadi ngagai Menyadi Kim enggau Menyadi Polevodov lain ari ke biasa. Laban seduai iya dituduh ba dua iti kes. Piak penasat enggai nyampurka dua iti kes tu. Nya kebuah, Menyadi Kim enggau Menyadi Polevodov patut datai gagai kot ti enda sama ba bandar Khabarovsk.

Kitai nemu, Jehovah tentu deka ngeringka sida, bini sida, sereta bala anak sida, ngambika ulih mengkang tetap ati. Roh kudus Petara mega tentu deka terus nyaga runding sereta ati sida.—Pilipi 4:7.