Kena 4 Februari 2021, a Kot Pelilih Birobidzhan ba Jewish Autonomous Region deka madahka pemutus pasal kes Menyadi Svetlana Monis. Penawa bedau madahka ukum ke deka dipinta iya beri ngagai Svetlana.

Svetlana Monis

• Ada: 1977 (Lesozavodsk)

• Biograpi: Iya napi penyakit mata ti majak balat-sebalat. Iya rindu belajarka bansa jaku baru. Iya udah belajarka jaku China, English enggau Jerman. Dalam betaun-taun, iya kediri aja ngemesaika anak lelaki iya. Kena melanja sida sebilik, iya muka kedai pemakai China

  Ketegal tusah ati meda utai ti enda lurus nyadi ba dunya tu, iya berengkah belajarka Bup Kudus. Iya dibaptisa kena taun 2005. Kena 2015 iya jadi enggau laki iya Alam Aliyev. Laki iya pan dituduh ngereja pengawa jenayah ba kes ke bukai

Kena 26 September 2019, Pegawai leftenen polis D. Yankin ari Federal Security Service (FSB) ngepunka kes jenayah ngelaban Menyadi Svetlana Monis. Dalam timpuh dua bulan, kot enda nyagi iya ngena kerita diri empu, taja pan iya patut ngena kerita nya nulung sereta ngangkutka ini iya ke beumur 91 taun.

Kena Disember 2019 FSB tembu mansik kes Svetlana lalu nganung kes jenayah nya ngagai Kot Pelilih Birobidzhan kena iya dipechara ba kot.

Lebuh ngenang baru pasal pemerinsa ke ditapi iya, Svetlana madahka: “Lebuh piak ti bekuasa ngerungkai rumah kami, aku diau jenuh aja. Nya baru aku ngasaika pengamat jaku Jesus ti madah: ‘Beberekat meh orang ke kena perinsa ketegal pengelurus.’”—Matthew 5:10.

Pengudah rumah sida diserungkai, laki Svetlana ke benama Alam pan ditangkap lalu ditan pengelama lapan hari. Iya ngenang: “Utai ti pemadu tusah ba aku, iya nya nagang diri ari kelalu irauka laki aku. Aku balat irau laban iya napi penanggul ba tulang belakang iya ti majak balat-sebalat. Indah iya berubat ba sepital ketegal penanggul tu . . . semina seminggu aja sebedau rumah kami diserungkai. Maya nya aku enda ulih bejaku enggau Alam, nyadi aku enda nemu sekalika iya OK tauka enda. Aku mantaika semua asai ati aku ngagai Jehovah, lalu aku arapka Iya deka nyaga Alam enggau manah.”

Svetlana nadai kala kakang ati pasal sukung Jehovah. Iya madah: “Aku meda enggau ngasaika sukung Iya. Maya nya, aku nemu, aku enda tau alah laban panik. . . . Aku nguji nyeliahka diri ari kelalu berundingka diri empu. Tang aku befokus ngagai chara aku ulih mengkang tetap ati ngagai Jehovah.”

Ngambika seduai iya mengkang ngembuan runding ti positif, Svetlana enggau Alam bebendar ngeringka pengarap diri. Iya madah, “Ninting hari kami duai laki aku macha enggau berandauka ayat ninting hari, sereta macha sebagi ari Bup Kudus. Kami bebendar agi belematika ayat ti ngasuh kitai ngiga pengelantang ba Jehovah sereta bepanggai ngagai Iya.” Ayat taun 2019, iya nya Isaiah 41:10 NWT, madahka “Anang irau, laban Aku tu Petara kita.” Ayat tu ngingatka Svetlana enggau Alam pasal pengerindu Jehovah. Svetlana madah, “Kami nyelak ayat tu, lalu ngelekatka iya ba dinding rumah kami.”

Ketegal pengeliat ati Svetlana, sekeda ari kaban belayan iya ke ukai Saksi udah ngubah runding sida pasal pengarap iya. Svetlana nerangka: “Aku udah bepeluang meri saksi ngagai indai aku ke kala nyakal aku suba. Diatu iya bebasaka pemutus kami sereta suah madahka penyinu enggau sukung iya ke kami.” Iya nambah: “Ini aku, ke beumur 91 taun, megai pengarap gerija Orthodox. Iya seruran mantaika penyiru enggau pengibuh iya ke kami. Indah iya berengkah ngayanka minat pasal Bup Kudus.”

Kitai semampai berundingka Svetlana seduai Alam. Kitai andalka sida ulih mengkang ngembuan runding ti positif laban Jehovah “meri sida pemerani.”—Masmur 10:17.