Kena 31 Mac 2021, Kot Pelilih Birobidzhan ba Jewish Autonomous Region ngumbai Menyadi Tatyana Zagulina besalah. Iya diberi ukum jil pengelama dua taun setengah ti ditangguh.

Tatyana Zagulina

• Ada: 1984 (Kampung Selektsionnaya, Begian Trans-Baikal)

• Biograpi: Iya kala belajar pasal fashion. Iya gawa nyadi orang ke ngias kuku enggau tukang jait, kelebih agi iya ngaduka gaun pengantin indu. Iya rindu main volleyball enggau ping pong, betanda sereta nganyam

  Seumur idup iya bisi minat pasal utai ke ngelingi ba bumi tu, lalu iya pechayaka semua utai ditempa. Nyau kelama, iya belajarka Bup Kudus enggau Saksi-Saksi Jehovah. Iya dibaptisa kena taun 2010. Iya jadi enggau Dmitriy kena taun 2012

Kena 17 Mei 2018, 150 iku pegawai piak ti bekuasa nyerungkai 22 buah rumah Saksi-Saksi Jehovah. Sida ngumbai operasi tu “Hari Pechara.” Kenyau ari nya, 22 iku menyadi kitai ba endur nya dituduh piak ti bekuasa ngereja pengawa jenayah. Kena 6 Februari 2020, piak ti bekuasa ngepunka kes jenayah ngelaban enam iku menyadi indu kitai nyengkaum Tatyana, lalu nuduh sida ngereja pengawa ke dikumbai “ekstremis.”

Kes iya belabuh dipechara kenyau ari 17 September 2020. Seraya iya nganti kes iya tembu diperesa, piak ti bekuasa nagang iya ari pansut ari pelilih nya sereta nagang iya ngambi duit diri empu ari bank.

Tatyana madahka utai ke nulung iya napi pemerinsa tu sereta terus nginjil enggau ngetanka pengarap diri iya nya, sampi sereta jadual macha enggau belematika Bup Kudus. Ku iya: “Lebuh [piak ti bekuasa] datai lalu ngetuk pintu aku enggau inggar, aku takut. Tang tekala nya aku besampi. Pengudah nya, ati aku tendur ari pengirau aku.”

Ambika chunto, lebuh rumah iya benung diserungkai, iya madahka seiku pegawai pasal pengarap iya ke dikeringka sehari nya. Iya nanya nama kebuah nya. Tatyana nyaut, tu ketegal iya ngasaika diri udah ngamatka jaku Jesus ba John 15:20 ti madah: ‘Ulun enda besai agi ari tuan iya. Enti sida merinsaka aku, sida deka mega merinsaka kita.’ Ku Tatyana nampung: “Seiku ari sida nyaut aku munyi tu: ‘Enti pia, aku ngasaika diri baka seiku ari sida ke munuh Jesus.’ Tekala nya, pengarap aku dikeringka tang ukai nya aja, aku pan ngasaika pemaik enggau pengelantang dalam ati aku. Aku ngasaika Jehovah ngimbai aku!” Lebuh kes iya berengkah dipechara ba kot, iya berasai takut. Tang iya madah, pengudah besampi minta pemerani, “Aku kempang ati bejaku.”

Kitai meri terima kasih ngagai Jehovah ti nyukung sereta merekatka pengawa ke dikereja sida ke pengarap enggau pengerindu, sereta pengeliat ati bala menyadi ke dikesayau kitai ba Rusia.—1 Tesalonika 1:2, 3.