Kena 2 September 2019, Kot Menua Zheleznodorozhniy ba Khabarovsk Rusia, mutuska Menyadi Valeriy Moskalenko ngaga pengawa ke orang mayuh pengelama dua taun dua bulan, lalu enam bulan dikemataka piak ti bekuasa laban iya dikumbai penjenayah. Iya enda ditan ba rumah jil agi.

Pengudah pemutus ari kot tu dipadah, Menyadi Moskalenko pansut ari rumah jil, lalu ulih begulai enggau sida sebilik sereta bala kaban iya. Iya ditamaka ngagai rumah jil kena 2 Ogos 2018. Sebedau iya ditangkap, iya gawa nyadi penulung orang ke ngemataka kerita api, pia mega nyaga indai iya ke benung sakit. Sepemanjai enam bulan tu, iya deka dikemataka piak ti bekuasa, lalu enda ulih pansut ari Khabarovsk, sereta patut betemu enggau polis tauka piak bekuasa tiap bulan kena nentuka iya enda ngereja sebarang pengawa jenayah.

Maya kes iya dipechara kena 30 Ogos, Menyadi Moskalenko nyebut sebagi ari jaku penutup iya ke madah: “Nadai jaku aku deka ngelaban peneka Petara ke udah ngengerang ditulis dalam Bup Kudus. Aku deka madah, enda ngira ni pemerat ukum tauka ni pemalat aku ditekan, indah enti aku patut diukum mati, aku enda sekali-kali ninggalka Penempa dunya raya tu, iya nya Petara Jehovah ti pemadu bekuasa.”

Yaroslav Sivulskiy, pengari Raban Saksi-Saksi Jehovah ba Eropah madahka: “Taja pan kami enda setuju enggau dawa tu, tang kami amat gaga meda Valeriy ulih bibas.”

Kelimpah ari Menyadi Moskalenko, tujuh iku da agi menyadi lelaki kitai ba Menua Khabarovsk agi benung nganti pemutus kes sida.

Kitai amat beterima kasih ngagai Jehovah, laban pengarap Menyadi Moskalenko mengkang tegap taja pan napi penyakal. Kitai besampi ngambi Jehovah terus ngeringka semua menyadi kitai ke diperinsa ketegal pengarap sida ke nitihka ajar Bup Kudus.—Isaiah 40:31.