Kena 2 Jun 2021, Kot Pelilih Zeya ba Begian Amur ngumbai Menyadi Vasiliy Reznichenko besalah. Iya diberi ukum jil pengelama dua taun ti ditangguh.

Vasiliy Reznichenko

• Ada: 1942 (Murovka, Begian Primorye)

• Biograpi: Iya anak bunsu ari lima iku menyadi. Iya dilatih ba pengawa deriba traktor, ngiring kapal sereta mekanik. Iya pan kala nyadi soldadu. Pengudah badu enggau pengawa soldadu, iya nyadi pengiring kapal lalu nyau kelama niki pangkat lalu nyadi kapten kapal. Iya diberi gelar ti meri basa ngagai soldadu ke kala gawa ke Soviet Union

  Kena taun 1969 iya jadi enggau bini iya Valentina. Seduai iya ngemesaika tiga iku anak lelaki. Kena 1990-an, Valentina madahka Vasiliy pasal pemendar ari Bup Kudus. Pengudah iya nemu pasal tuju Petara ke dunya tu, iya belabuh belajarka Bup Kudus enggau ransing. Vasiliy dibaptisa nyadi Saksi Jehovah kena taun 1996. Bini iya nadai kena taun 2016

Kena 21 Mac 2019, bala polis ba kampung Zeya nyerungkai rumah Menyadi Vasiliy Reznichenko. Sida ngerampas laptop, talipun binching sereta dokumen iya. Kenyau ari nya, perintah Rusia ngumbai iya orang “ekstremis” lalu iya ditagang ari ngambi duit diri empu ari bank. Iya mega enda ulih pansut ari nengeri iya.

Vasiliy tetap bepanggai ba tulung ari Jehovah. Macha Bup Kudus sereta ayat ke ninting hari nulung iya befokus ba utai ti manah. Iya mega beterima kasih ke bala menyadi Kristian ke ngayanka pengerindu ngagai iya.

Ku iya: “Pagi siti pengudah rumah aku diserungkai lalu aku ditasat, bala menyadi ari eklisia ngabas aku. Sekeda ari sida mega udah napi serungkai ba rumah sida empu. Dua hari udah bekau nya, beberapa iku menyadi lelaki ari nengeri bukai ke semak, datai ngabas aku. Aku nemu sida berambunka pengelepas diri sehari nya. Tang penatai sida amat meransang aku. Lebuh aku ngenang baru pasal sida ke ngabas aku, enda berasai bisi ai mata labuh.” Ku iya nampung: “Peneleba baka tu negapka kaul aku enggau Jehovah. Iya semak agi enggau aku ari ke suba.”

Ayat ba Hebrew 13:5 meri pengering sereta pengelantang ke Vasiliy. Ku iya nerangka: “Aku keran deka mengkang arapka semaya Jehovah ti madah: ‘Aku enggai sekali-kali ninggalka kita, tauka ngelengkaka kita.’” Kitai arapka Jehovah deka seruran nyukung bala menyadi kitai ke diperinsa ketegal pengarap sida.