Kena 27 Januari 2021, a Kot Pelilih Nadezhdinskiy ba Begian Primorye deka madahka pemutus pasal kes Menyadi Vladimir Filippov. Iya engka deka dijil pengelama enam taun setengah.

Vladimir Filippov

• Ada: 1943 (Oktyabrskiy, Begian Novosibirsk)

• Biograpi: Maya Perang Dunya Kedua, apai iya nadai enda lama sebedau iya ada. Kena taun 1964 iya tembu belajar ba sekula soldadu di Tomsk lalu nyadi leftenan. Iya jadi enggau Lyubov kena taun 1967. Iya gawa nyadi soldadu pengelama 27 taun sebedau iya badu gawa

  Enda lama pengudah bini iya berengkah belajarka Bup Kudus, iya pan belabuh belajar kena taun 1994. Seduai iya bela dibaptisa ba taun ti nangkanka nya

Kena Ogos 2017, piak ti bekuasa berengkah belalai ngerikut audio enggau video pasal Menyadi Vladimir enggau menyadi bukai ba Rasdolnoye. Dalam beberapa bulan, sida belalai ngerikut utai ke disebut Vladimir ba gempuru sereta randau iya enggau orang ke berimbai pendiau pasal Bup Kudus.

Kena 19 Julai 2018, bala pegawai Federal Security Service (FSB) ke bepegai senyata sereta nutup mua nyerebu rumah iya. Sida mukut Vladimir ba mua, mejal iya gali ba lantai, nachang jari iya ari belakang lalu nyerungkai apartment iya. Maya nya, umur Vladimir udah 75 taun. Rumah sida Vladimir sebilik diserungkai baru dua kali kena Ogos 2019 enggau Januari 2020. Pengudah kali kedua rumah iya diserungkai, Vladimir dituduh dalam kes jenayah.

Arapka Jehovah terus ngeringka bala menyadi kitai ngambika sida ulih mengkang gaga ati sereta tegap ba pengarap!—Isaiah 40:29, 31.