Kena 31 Mei 2021, Kot Pelilih Gornomariyskiy ba Mari El ngumbai Menyadi Yekaterina Pegasheva besalah. Iya diberi ukum jil pengelama enam taun setengah ti ditangguh.

Yekaterina Pegasheva

• Ada: 1989 (Gaintsy, Begian Kirov)

• Biograpi: Iya anak tunggal. Iya rindu macha bup, nuliska pantun sereta belagu. Iya tukang tuchi. Iya kala belajarka jaku Mari ngambika nginjil ngagai mayuh agi orang

Kena 3 Oktober 2019, Menyadi Yekaterina ditangkap ba Yoshkar-Ola, iya nya indu nengeri Republik Mari El. Bala polis nyerungkai rumah iya lalu ngerampas bup, perengka elektronik, surat enggau dokumen bukai ke enggi iya. Ketegal iya berandau pasal Bup Kudus enggau orang ke sepengarap enggau iya, iya dituduh ngereja pengawa ke gerempung ti ditagang perintah.

Yekaterina ngenang utai ke nyadi sehari nya: “Enda memukai, bala polis nya nyerang aku di sebelah jalai, melawikka jari aku ke belakang lalu ngejuka aku ngagai siti pun kayu. Aku sempat meri sampi pandak minta tulung ari Jehovah, sama baka Nehemiah.” Pengudah iya ditangkap, Yekaterina dijil pengelama 100 hari seraya nganti kes iya dipechara. Diatu iya agi ditan ba rumah diri empu.

Yekaterina suah ditasat lebuh iya dijil. Tang utai ke dipelajar iya ari Bup Kudus nulung iya maya nya. Ku iya ngenang baru: “Aku ingatka cheramah ke didinga aku sereta begian ke disediaka aku maya aku enggau Sekula Penginjil Perintah Petara. Siti utai ke dikingatka aku meri aku pengering. Iya nya, lebuh nuan ditasat bala munsuh, nuan pan bediri di mua Tuan kitai Jesus. Pengingat tu nulung aku ngayanka basa sereta nagang diri lebuh aku bejaku enggau pegawai piak bekuasa ke nuduh aku enggau nadai kebuah.”

Ketegal iya udah dijil tauka ditan ba rumah iya lebih ari setaun ti udah, Yekaterina napi mayuh penanggul. Pengerai iya majak enda manah, lalu iya enda ulih gawa kena ngulihka belanja. Iya mega amat tusah ati laban iya diserara ari indai enggau ini iya. Taja pan iya napi semua penusah tu, iya keran deka mengkang taluk ngagai Jehovah. Ku iya: “Majak aku ditekan, majak aku ngerasukka ‘kereban perang ari Petara.’” Iya nambah: “Diatu, aku enda takutka sebarang utai! Sebedau tu aku sigi bisi pemerani, tang ari saup roh kudus Petara, diatu aku berani agi ari suba.”

Seraya Yekaterina nganti kot ngaga pemutus pasal kes iya, kitai andalka iya deka seruran bepanggai ba Jehovah ke ngeringka semua nembiak Iya.—Pemansut 15:2.