Kot Pelilih Birobidzhan ba Jewish Autonomous Region nyangka deka madahka jaku gerah pasal kes Menyadi Yelena Reyno-Chernyshova kena 29 Januari 2021. a Piak ti bedawa empai madahka nama ukum ke dipinta sida beri ngagai Yelena.

Yelena Reyno-Chernyshova

• Ada: 1968 (Maloy, Begian Irkutsk)

• Biograpi: Kena 1990-an iya belajarka Bup Kudus enggau Saksi-Saksi Jehovah. Utai ke dipelajar iya meransang iya badu agi nyadi soldadu sereta ngemanahka agi tikah iya. Iya dibaptisa kena taun 1998

• Taja pan laki iya enda sepengarap enggau iya, laki iya nyukung pemutus iya deka nyembah Jehovah. Iya rindu main bul sereta volleyball

Kena 29 September 2019, piak ti bekuasa ba Birobidzhan mantainka jaku tuduh ngelaban Menyadi Yelena Reyno-Chernyshova.

Bala pegawai Federal Security Service (FSB) deka ngemba iya lebuh sida nyelungkai rumah Yelena. Iya madahka Jehovah meh ke nulung iya enda kelalu irau maya nya. Iya ngenang: “Aku enda ngetu-ngetu besampi ngagai Jehovah, minta pemerani sereta ati ti tan, ngambika ulah aku tau dipebasa orang bukai, sereta enda ngelebuka Jehovah. Iya ke amat, lebuh sida nyelungkai rumah aku, semua utai teratur lalu nadai orang kasar enggau aku.”

Sida Yelena sebilik napi mayuh penanggul ketegal kes jenayah tu. Kena bulan Julai 2020, laki iya kena serang sakit jantung (nya meh kali ketiga iya kena.) Yelena disekat sereta ditagang ari pansut ari nengeri Birobidzhan. Iya mega enda dikemendarka ngambi duit diri ari bank.

Siti utai ke nulung Yelena mengkang berani, iya nya belematika nembiak Jehovah ke bukai ti udah betan lebuh disakal. Ku iya nerangka: “Aku rindu macha artikel berita pasal bala menyadi ke udah napi serungkai ba rumah sida, tauka diperinsa ketegal pengarap. Taja pan sida napi mayuh penusah enggau pengawa ti enda lurus, tang sida betan enggau berani.” Iya mega bulih penguntung ari bejarit macha enggau belematika Bup Kudus.

Seraya iya natka diri diperinsa, iya belematika jaku ba Isaiah 30:15. Dia madah: “Panggaika pengarap kita ba Aku. Nya baru kita deka kering sereta likun.” Iya nerangka: “Aku seruran berundingka ayat tu. Aku chukup beterima kasih ngagai Jehovah, laban iya narit ati aku ngagai Iya! . . . Aku seruran ngasaika pemaik dalam ati aku. Aku majak andalka Jehovah, sereta bepanggai ngagai Iya dalam sebarang pekara. Aku pechaya, iya nadai kala besangkalka aku.”