Kena 20 Januari 2021, Kot Pelilih Birobidzhan ba Jewish Autonomous Region ngumbai Menyadi Yevgeniy Golik besalah. Kot nya meri iya ukum jil pengelama dua taun setengah ti ditangguh. Ke diatu, iya enda ditan ba jil. Iya deka ngapil pemutus tu.

Yevgeniy Golik

• Ada: 1975 (Birobidzhan, Jewish Autonomous Region)

• Biograpi: Iya gawa nyadi tukang welding. Sebedau iya nyadi Saksi, iya kala nyadi soldadu Rusia

  Iya belajar pemendar ari indai iya. Ari tu, iya tetemuka saut ti ngemuaska ati ngagai tanya iya pasal tuju pengidup. Ajar Bup Kudus mega nulung iya sayau agi ke orang bukai

Kena tumu pagi 17 Mei 2019, 150 iku pegawai Federal Security Service (FSB) nyerungkai semilan buah rumah Saksi ba nengeri Birobidzhan, nunga ke timur menua Rusia. Operasi tu dikumbai FSB nya “Hari Pechara.” Piak ti bekuasa ngepunka kes jenayah pasal Menyadi Yevgeniy Golik enggau 21 iku menyadi lelaki enggau menyadi indu ke bukai ba Jewish Autonomous Region. Kes iya belabuh dipechara kena 29 Januari 2020.

Piak bedawa mantaika bukti kena nyukung kes sida nyengkaum video ke nunjukka Yevgeniy belajarka Bup Kudus enggau beberapa iti litaricha ti bepelasarka Bup Kudus.

Endang tusah nyadi mansa pengawa ti enda lurus. Taja pia, Yevgeniy nerangka: “Lebuh aku bejarit belajarka Bup Kudus sereta besampi ngagai Jehovah, tu nulung aku beberatka agi Jehovah ari ke penanggul ti ditapi aku. Lalu ajar Bup Kudus ti badas ngagaka ati aku, lalu pengaga nya meransang aku bekunsika utai ti meransang tu enggau orang bukai.”

Yevgeniy bulih mayuh penguntung ari belematika ayat ba Masmur 23:4. Ku iya: “Ayat tu nulung aku nyadi berani sereta betan enggau ati ti gaga. Indah enti nyawa kitai nyangka dianu, Jehovah tetap seruran bisi enggau kitai.”

Bala menyadi Kristian iya mega nulung. Iya nerangka: “Bala menyadi datai ke kot lebuh kes aku berengkah dipechara. Nya amat meransang aku. Pia mega, ba maya ti tusah tu, bini aku ti nyadi pemeri ari Jehovah, amat mayuh nulung aku. Aku seruran gaga ati. Aku bisi jaku Petara ti negapka pengarap, pemakai ti ngeringka tubuh sereta mayuh tulung ke bukai.”

Yevgeniy keran deka ngetanka kaul iya enggau Jehovah. Tu meh jaku lalau iya ngagai orang ke bedau kala napi pemerinsa baka tu: “Belajar meh lagu Perintah Petara, belajar mega rinduka munsuh nuan, lalu belajar meh chara nyembah Petara enggau gaga ati enda ngira nama penyadi.”

Awakka semua kitai terus neladan bala menyadi kitai ba Rusia. Baka Jehovah udah ngeringka sida napi sebarang penguji, baka nya mega Iya deka ngeringka semua kitai.—Masmur 29:11.