Kena 18 Februari 2021, a Kot Pelilih Birobidzhan ba Jewish Autonomous Region deka madahka jaku gerah pasal kes Menyadi Yuliya Kaganovich. Penawa bedau minta sebarang ukum.

Yuliya Kaganovich

• Ada: 1966 (Mikhaylovka, Begian Volgograd)

• Biograpi: Iya udah belajar nyadi injineer. Lebuh agi nembiak iya abis belajarka sekula musik, belajar betanda, nebah perengka musik sereta enggau koir. Laki iya, Aleksandr, enda sepengarap enggau iya, tang iya nyukung Yuliya sereta ngumbai kes jenayah tu endang enda lurus

  Pengudah lenyau orang ke dikesayau iya, iya berengkah berundingka reti pengidup. Saut ari Bup Kudus ngemuaska ati iya sereta nulung iya ngembuan pengadang. Iya dibaptisa kena taun 1998. Ketegal nitihka prinsip Bup Kudus, iya udah ditulung ngemanahka agi tikah, kaul enggau orang bukai, sereta mujur ngemesaika anak iya Artur, ti sama nyadi Saksi Jehovah

  Iya napi penanggul ba pengerai, lalu ketegal napi pemerinsa tu, pengerai iya nyadi majak balat

Menyadi Yuliya Kaganovich ngenang: “Lebuh pintu aku diketuk tumu pagi, aku endang udah nemu sapa ke datai. Jantung aku bedegup enggau jampat, lalu aku majak ngulang siti leka jaku aja: ‘Tulung meh aku, Jehovah. Tulung meh aku, Jehovah.’”

Sakal ke diasaika menyadi kitai Yuliya, ke beumur 53 taun, berengkah kenyau ari 10 Oktober 2019 ba nengeri Birobidzhan. Lebuh bala pegawai Federal Security Service (FSB) ngenyit nyerungkai lebih ari 20 buah rumah menyadi kitai ba Jewish Autonomous Region, rumah Yuliya mega siti ari nya.

Taja bala pegawai nya mujur nyakal bala menyadi kitai, tang Yuliya enggau sida Saksi ke bukai ulih mengkang kering ketegal udah besedia.

Yuliya nerangka: “Ba gempuru, kami seruran dikingatka, rumah kami nyangka deka diserungkai, lalu kami patut besedia. Ketegal aku udah nyangka utai tu deka nyadi, aku udah dulu berundingka nama utai ke patut digaga sereta disebut aku. Aku nemu, nyediaka diri nya utai ti amat beguna. Ketegal aku udah besedia aku enda kesal ati tauka charut runding, lalu nemu nama patut digaga.”

Baka ke udah dijangka, enggau jampat piak ti bekuasa ngepunka kes jenayah ngelaban Yuliya enggau bala menyadi ke bukai. Sida dikumbai ngereja pengawa ekstremis.

Kena 3 Mac 2020, kes nya dibai ngagai Kot Pelilih Birobidzhan. Ketegal penyakit COVID-19, kes nya ditangguh pengelama lima bulan. Yuliya dikangauka ngagai kot baru kena 22 Oktober 2020.

Yuliya madah: “Sapa meh ka diperinsa enggau chara ke baka nya? Tang bisi ga ati aku gaga laban bepeluang ngetanka Jehovah.”

Iya nampung: “Jaku ba Isaiah 41:10 amat engkeman ba aku. Aku nyelak ayat tu ba siti keretas lalu ngelekatka iya ba dinding rumah aku ngambika aku seruran ingatka jaku Jehovah ti meransang aku. Taja pan patung aku asai ke lemi sereta begetar, aku ngasaika Jehovah ngeringka aku.”

Yuliya udah bebendar nguji ingatka beberapa ayat Bup Kudus ti ulih nulung iya tendur agi ari pengirau, berani sereta gaga ati taja pan napi pemerinsa.

Awakka semua kitai sama nyediaka diri ba runding, emosi sereta pengarap, kena natka pemerinsa ke dijangka kitai dudi hari. Kitai andalka, Jehovah “nadai kala enggai meri utai ti manah ngagai orang ke ngereja utai ti ngena.”—Masmur 84:11.