Kena Hari Satu, 4 Oktober 2021, pegawai polis ke besenyata a nyamah Menyadi Anatoly enggau bini iya Greta Razdobarov, sereta Menyadi Nikolay enggau bini iya Liliya Merinov. Serang ke amat jai tu nyadi lebuh beberapa iti raban pegawai polis nyerungkai 12 buah rumah Saksi Jehovah ba nengeri Irkutsk. Beberapa iku menyadi ke bukai mega ditangkap.

Kena 6 pagi, pegawai polis nyerebu tama ngagai rumah Anatoly seduai Greta. Sida narit buk Greta lalu mai iya ngagai siti bilik. Jari iya digelang ba belakang lalu sida malu iya mayuh kali.

Ba maya ti sama, Anatoly diju ngagai lantai, jari iya digelang ari belakang sereta pala enggau perut iya disipak. Sida ngangkat jari Anatoly ke digelang nyentukka tubuh iya terangkat ari lantai. Anatoly amat pedis laban pemerat tubuh iya ngasuh bau iya bakal. Sida malu jari iya sereta mejal iya madahka diri ngereja jenayah enggau madahka sida pasal menyadi bukai. Pegawai polis merinsaka iya enggau nepuka botol kaca ngagai burit iya. Rumah seduai iya diserungkai pengelama lebih ari lapan jam.

Lebuh pegawai polis nyerebu tama ngagai rumah Nikolay seduai Liliya Merinov, keterubah sida ngena utai ti tumpul kena malu mua Nikolay. Iya rebah ke lantai lalu luput. Lebuh iya dani, iya sedar bisi seiku pegawai polis duduk ba atas iya lalu malu iya. Pegawai polis nya matahka ngeli depan Nikolay. Liliya diirit ngena buk iya ari katil, lalu jari iya digelang. Sida nyerang iya enggau mayuh kali sebedau sida ngemendarka iya nukar gari.

Nitihka undang-undang Rusia, sida ke salah ngena kuasa ulih diukum. Kelimpah ari nya, perintah Rusia patut nitihka undang-undang ke ditetapka beberapa iti gerempung entarabansa kena ngelindung orang ari diperinsa. Nya alai, dua pasang laki bini tu deka mai kes tu ngagai kot Rusia sereta entarabansa, kena madahka pasal kes jenayah tu.

Dalam dua hari pengudah utai tu nyadi, kot ngasuh enam iku menyadi lelaki ditan ba rumah jil sementara sebedau nganti diri dipechara, iya nya: Yaroslav Kalin, Sergey Kosteev, Nikolay Martynov, Mikhail Moish, Aleksey Solnechny, enggau Andrey Tolmachev. Kira-kira 300 iku bala menyadi datai ngagai kot kena nyukung menyadi Kristian sida ke napi utai ke enda lurus tu.

Nuju ngagai semua bala menyadi ke dikerindu ba Rusia, kami nandu jaku rasul Paul ke dituju ngagai eklisia Tesalonika: ‘Kami empu temegahka kita di mua semua eklisia Petara, ketegal kita tan ati, enggau ketegal pengarap kita, taja pen kita natka semua macham pemerinsa enggau penusah.’—2 Tesalonika 1:4.