Kena 1 April 2021, seraban pemberita begelumu di Moscow, Rusia, laban deka berandauka ulang taun ke-70 Operasi Utara. Operasi Utara dituju ngagai pengawa nabanka nyauka 10,000 iku Saksi-Saksi Jehovah ngena kerita api ngagai Siberia ba taun 1951. Bisi enam iku pencheramah, nyengkaum pakar sejarah enggau hak mensia, ti ngenataika begian sida sereta nyaut tanya ari bala pemberita. Raban pencheramah nya ukai semina ngenang utai ke kala nyadi kena 1951 tang pan nunjukka pemerinsa tu diulang baru diatu ba menua Rusia. Semua program nya dipandangka terus nengah online.

Yaroslav Sivulsky, seiku pengari Gerempung Saksi-Saksi Jehovah di Eropah, bejuraika pasal pemalat pemerinsa ke ditapi sida ke ditaban maya Operasi Utara. Ruang bilik Yaroslav empu pan bisi entara sida ke ditaban. Ku iya: “Lebuh meresa dokumen ari sejarah, kitai nemu bisi 9,793 iku Saksi-Saksi Jehovah enggau diri sebilik sida ke ditaban ke Siberia. Penyampau tu nyengkaum orang ke bebadi sereta anak mit ke diada, lebuh benung ditaban ba kerita api.”

Sergey Ivanenko, seiku pakar pasal pengarap ba Rusia, bejaku pasal chara propaganda ke ditusui perintah Soviet Union meri empas ngagai Operasi Utara. Pia mega, kemayaharitu propaganda agi dikena perintah Rusia ngemansangka sakal ngagai Saksi-Saksi Jehovah. Enggau silik iya nerangka utai ke nyadi ba Saksi-Saksi Jehovah suba, lalu bejaku pasal pengeliat ati ke diayanka sida. Ku iya: “Taja pan perintah Rusia bebendar merinsaka Saksi-Saksi Jehovah enggau kasar, baka ke udah nyadi kenyau ari taun 2017 nyentukka diatu, nya sigi nadai guna. Pengeliat ati sida bala Saksi ke ditaban maya Operasi Utara, sereta Saksi-Saksi Jehovah ke disakal kemayaharitu tang mengkang taluk ngetanka pengarap sida, nyadika bukti perintah Rusia enda ulih mujur ngerusak pengarap Saksi-Saksi Jehovah. Ari tu kitai ulih meda, enti perintah Rusia badu agi nagang pengawa Saksi-Saksi Jehovah, iya ke amat, tu mulaika penguntung ngagai perintah menua.”

Artur Artemyev nya seiku pakar pasal pengarap ba menua Kazakhstan, sereta penulis bup Saksi-Saksi Jehovah di Kazakhstan: Meresa Sejarah Pengarap (ke diaduka kena taun 2020.) Iya nerangka, indah akal ti pemadu balat ti dikena nyerang Saksi-Saksi Jehovah ba Soviet Union enda ulih ngemunaska sida tauka ngelemika pengarap sida. Iya ke amat, sekumbang Soviet Union megai menua Kazakhstan, penyampau Saksi-Saksi Jehovah majak nambah. Kelimpah ari nya, Valery Borschev ari Raban Helsinki Moscow nambah: “Lebuh Saksi-Saksi Jehovah disakal, sida nyadi majak kering ba pengarap. Piak ti bekuasa patut meretika utai tu.”

Valentin Gefter, seiku ari Raban Pakar ke diatur Pesuruhjaya Hak Mensia di Rusia berandauka topik “Orang ke Dijil Ketegal Pemutus Penemu Ati ba Rusia.” Saksi-Saksi Jehovah ba Rusia ukai dijil ketegal pemutus sida ba hal politik, tang ketegal penemu ati sida. Valentin nekanka poin tu: “Saksi-Saksi Jehovah ukai munsuh perintah menua.” Iya nerangka, ketegal pengarap sida, Saksi-Saksi Jehovah mutuska mengkang neutral ba hal politik. Ketegal tu, piak ti bekuasa ngejil Saksi-Saksi Jehovah taja pan sida nadai penyalah.

Pencheramah ti penudi nya Aleksandr Verkhovsky. Iya seiku ari Raban Penyanding Penemu President Rusia Senentang Hak Mensia sereta pengarah Pusat Penerang enggau Peresa SOVA. Pusat Sova nya meresa sereta nyimpan riput pasal tiap kali undang-undang ke ngeleban pengawa ekstremis dikena enggau chara ti salah, nyengkaum kes ke bekaul enggau Saksi-Saksi Jehovah. Iya mantaika penemu iya pasal sakal ke ditapi Saksi-Saksi Jehovah ba Rusia kemayaharitu munyi tu: “Kati kimpin nyakal Saksi-Saksi Jehovah ke dipejalaika perintah Rusia tu, deka kurang tauka badu agi dudi hari? Tanya tu beguna bendar. Tang ke diatu, kami pan enda nemu saut ngagai tanya nya.” Aleksandr pechaya, nyau kelama piak ti bekuasa Rusia enda tau enda badu agi merinsaka Saksi-Saksi Jehovah. Iya meri penemu diri pasal chara pegawai perintah ke ngemataka undang-undang menua, ulih ngubah undang-undang senentang pengawa ekstremis nya, ngambika menua Rusia ulih dilindung ari pengawa ti endang patut dikumbai ekstremis, tang ba maya ti sama enda ngelanggar hak rayat ti deka bejalaika sembah sida enggau chara ti enda ngachau orang bukai, nyengkaum sida bala Saksi Jehovah.

Bala pemberita bepeluang betanyaka bala pencheramah pasal utai ke dipejuraika sida.

Kena hari ti sama, siti konferen dipejalaika ba Chisinau, Moldova, ke diatur Pusat Sejarah enggau Sains Moldova, Alecu Russo State University di Balti sereta Bogdan Petriceicu Hasdeu State University di Cahul. Siti da agi konferen deka dipejalaika ba Ukraine kena 9 April 2021.