Bala pegawai ari Eropah enggau Amerika Serikat terus mantah pengawa merinsaka Saksi-Saksi Jehovah di menua Rusia.

Gayle Manchin ke nyadi Chairman USCIRF ngeluarka jaku gerah kena 27 Oktober 2020 ti madah: “Kami ari USCIRF balat tekenyit sereta tusah ati pasal chara menua Rusia udah merinsaka Dennis Christensen. Endang nyata, perintah menua begedika orang ti enda besalah tu, ketegal iya deka bejalaika pengarap iya enggau chara ti enda ngachau orang bukai. Ari ke ngayanka pengasih tauka penyinu, piak bekuasa ngukum iya baka iya seiku penjenayah ti ngemedis tauka mai penusah. Tu amat enda lurus.”

Nengah Projek Ngetanka Orang ke Ditangkap Ketegal Pengarap, ke dipegai USCIRF, Gayle Manchin deka ngetanka sereta nyukung Menyadi Dennis Christensen. USCIRF nya strongly condemned Brother Christensen’s six-year prison sentence on udah mayuh kali madahka jaku gerah ti mantah ukum jil ke diberi ngagai Menyadi Dennis.

Ba jaku gerah ti baru tu, sida mega mantah piak bekuasa Rusia laban enda ngemendarka Menyadi Dennis dibibaska tumu. Riput ke dikeluarka sida madahka “Kena 23 Jun [2020], pemendar diberi kena iya dilepaska ari jil, tang piak bedawa jejampat ngelaban pemutus nya. Ari ke dilepaska, Dennis lalu ditutup dalam sil mit alai ngukum orang tangkap ke dikumbai ngelanggar adat rumah jil.”

Jaku gerah nya ngujungka enggau jaku ke diambi ari Riput Taun 2020 sida. Riput nya mantah Rusia laban “pengawa merinsaka orang ketegal pengarap ba menua nya endang enda lurus, jai, sereta diteruska enggau diatur perintah menua empu” lalu pia mega, riput nya madahka perintah Amerika Serikat patut ngukum menua Rusia, laban mayuh pengirau pasal pengawa ti enda lurus ti dikereja dia.

Baka ke digaga USCIRF nya, lapan iku pegawai ke bepangkat tinggi ti dipilih ari Kunsil Hak Mensia Pertubuhan Bangsa-Bangsa Bersatu begulai nulis siti surat ke Opis Pengari Perintah Rusia ngagai Pertubuhan Bangsa-Bangsa Bersatu. Dalam surat nya sida madahka diri balat irau pasal “Perintah Rusia ti terus merinsaka Saksi-Saksi Jehovah, sereta ngerampas Pampang Opis Saksi-Saksi Jehovah di Rusia, lalu nagang pengawa ke bekaul enggau sembah ti diatur semua 395 iti gerempung pengarap Saksi ke direjister ba sesiti endur di Rusia.” Sida mega balat nganu Rusia laban enda pedulika peminta ari mayuh perintah enggau gerempung entarabansa kena badu agi merinsaka Saksi-Saksi Jehovah.

Bala pegawai nya nerangka, ketegal undang-undang Rusia ke bekaul enggau pengawa ‘extremis’ enda chukup nyemetak, piak bekuasa udah salah nguna undang-undang nya. Enggau tu, sida nguji “ngetuka pengawa Saksi-Saksi Jehovah; ngemba sida; ngachau pendiau sida lebuh rumah sida diserungkai tauka sida dikachau bala polis; nangkap, ngetan lalu nasat sida; indah nuduh sida ngereja pengawa jenayah lalu ngurung sida dalam jil.”

Sida mega beterus terang madahka: “Hak Saksi-Saksi Jehovah bejalaika sembah sida endang dijaga dalam artikel 18 (1) ba ICCPR.” a Nya alai, sida minta Perintah Rusia “nentuka Undang-Undang Taun 2002 ti Ngelaban Pengawa Extremis enda salah dikena ngambika nyekatka tauka ngerampas hak seseiku orang ke patut bibas ba runding, penemu ati, pengarap tauka utai ti dipechaya diri.”

Surat nya mega ngaku sekeda ari utai ti enda lurus ke udah dikereja ngagai bala menyadi kitai. Ambika chunto, surat nya madahka pasal lima iku Saksi ba Saratov ke dijamah kena 6 Februari 2020. Surat nya nerangka: “Saksi-Saksi Jehovah ke ditan suah napi ukum ti kasar, indah dijamah sereta diperinsa ba mental enggau emosi, lalu tu ulih dikumbai pemerinsa ti balat. Semua tu ketegal pengarap sida.”

Surat sida mega madahka pasal siti agi chunto, iya nya lebuh Menyadi Vadim Kutsenko balat dijamah piak polis kena 10 Februari 2020. Piak bekuasa di Rusia enggai ngaku utai tu nyadi. Tang, pegawai PBB enda pechayaka piak bekuasa Rusia, lalu sida agi “amat irau laban Saksi-Saksi Jehovah di serata menua Rusia diperinsa ketegal piak bekuasa ngumbai pengawa sida “extremis” taja pan nya enda ngachau orang bukai.”

Pengudah menua Rusia nagang pengawa Saksi-Saksi Jehovah sereta belabuh merinsaka sida kena taun 2017, Kunsil Komiti Bejalaika Pemutus Kot Eropah b berengkah betatika sekalika perintah Rusia deka ngasika dua iti atur ke ditetapka European Court of Human Rights (ECHR), lebuh menua Rusia dikumbai besalah ngelanggar hak Saksi-Saksi Jehovah. c Nya kebuah, kena 1 Oktober 2020, Komiti nya ngeluarka jaku gerah ti madahka sida “amat irau pasal pemutus ke digaga kena taun 2017, sereta mayuh riput ari mayuh endur . . . ti nunjukka, ketegal pemutus nya ti nagang pengawa Saksi-Saksi Jehovah, sida tu ditangkap, dituduh, sereta dijil semina ketegal bejalaika sembah sida enggau chara ti enda ngachau orang bukai.”

Ngambika ngemetulka pengawa ti enda lurus tu, Komiti nya ngasuh Rusia ngiga chara ngaduka “undang-undang ti ngelaban pengawa extremis, ke dikena enggau salah lebuh nagang pengawa Saksi-Saksi Jehovah sereta bedawaka sida.” Kelimpah ari nya, menua Rusia patut “muai pemutus kot ti nagang pengawa Saksi-Saksi Jehovah, sereta badu agi bedawaka sida.” Kena taun 2021, komiti nya deka meresa baru sekalika Rusia udah ngemetulka pekara tu tauka enda.

Kenyau ari 2017, lebih ari 400 iku menyadi kitai ba Rusia enggau Crimea udah dituduh ngereja pengawa “extremis.” Lebih ari 210 iku Saksi udah dijil dalam lebih ari 70 buah nengeri di serata menua Rusia.

Kitai ‘manggaika pengandal kitai ba kuasa Jehovah, Petara kitai’ ngambika Iya mengkang nulung bala menyadi kitai terus betan enggau ati ti liat.—Masmur 20:2, 7.