Kena 9 April 2019, Kot Menua Surgut meri pemutus ngelepaska menyadi Yevgeniy Fedin enggau Sergey Loginov. Pemutus tu belaban enggau pemutus perintah Rusia ke dekaka seduai iya majak ditan. Taja pan kes seduai iya ke dituduh ngereja jenayah agi benung ditasat, tang seduai iya dikemendarka pansut kena 11 April ari alai seduai iya ke ditan.

Menyadi Fedin enggau Loginov berengkah ditan kena 15 Februari 2019, lebuh rumah sida ba menua Surgut diabas bala polis enggau ngenyit. Maya nya bala perintah nuduh kesemua 19 iku bala Saksi ngereja jenayah. Tiga iku ari sida nya, menyadi Yevgeniy, Sergey, sereta Artur Severinchik berengkah ditan. Artur udah dilepaska kena 15 Mac.

Lebuh ditasat ba bulan Februari, polis merinsaka tujuh iku menyadi lelaki kitai, nyengkaum menyadi Loginov. Pengawa bala polis ti merinsaka sida udah dikompelin ngagai Kot Eropah ke Bekaul enggau Hak Mensia. Kes tu agi benung ditasat.

Kitai amat andal Jehovah deka terus ningaka sampi kitai lalu ngeringka bala menyadi kitai ke tetap ati ba Rusia.—Masmur 10:17.