Kena malam 10 Februari 2020, piak polis nangkap Menyadi Vadim Kutsenko, seiku ari Saksi-Saksi Jehovah. Iya dibai ngagai babas, lalu dijamah ba dia. Iya dipalu, dichekak, lalu dicharka enggau senapang karan ba perut sereta kaki. Sida sengaja ngereja penyai tu, ngambika Menyadi Vadim deka madah pasal Saksi-Saksi Jehovah ke bukai.

Ba pagi 10 Februari nya, piak polis Federal Security Services (FSB) nyelungkai nyauka 40 buah rumah Saksi ba Chita, nyengkaum rumah Menyadi Vadim empu. Kena pukul 11 malam nya, piak polis Rusia nangkap iya ba rumah mentua iya. Jari iya diikat, pala iya ditutup, udah nya dibai ngagai babas ke semak dia, lalu dijamah. Taja pan Menyadi Vadim dijamah, iya tetap enggai madah pasal Saksi Jehovah ke bukai. Pengujung iya, Menyadi Vadim dibai ke balai lalu ditasat.

Pengudah utai ke nyadi nya, Menyadi Vadim ditan begulai enggau tiga iku da agi menyadi lelaki ke bukai, iya nya Sergey Kirilyuk, Pavel Mamalimov, enggau Vladimir Yermolayev.

Dua hari udah nya, Kot Besai Ingodinskiy mutuska Menyadi Vadim, Kirilyuk, enggau Mamalimov tetap ditan pengelama 72 jam. Tang Menyadi Yermolayev ditan ba rumah.

Kena 15 Februari, Menyadi Vadim enggau dua iku da agi menyadi lelaki dibibaska. Sida bibas, laban bala penasat nadai chukup bukti kena bedawaka sida. Ketiga-tiga sida nadai dibai ngagai kot, tauka diukum sekat.

Aram meh kitai terus besampi, ngambika Menyadi Vadim enggau menyadi bukai ba Rusia tetap berani sereta kering. Lalu kitai pan andal, Jehovah tentu bisi semak sida sepemanjai penguji tu.—Joshua 1:7, 9.