Kena 26 Jun 2020, Menyadi Dennis Christensen ditan dalam sil ba senentang rumah jil alai orang tangkap ke pemadu jai diukum (ke dikumbai EPKT.) Enggau ngereja tu, piak ti bekuasa di rumah jil Lgov ngelanggar undang-undang. Engka ketegal pengerai Menyadi Dennis majak enda manah, piak ti bekuasa sengaja merinsa iya, ngambika pengarap iya nyadi lemi. Pia mega, diatu opis piak ti bedawa engka ngiga jaku tuduh ti bula kena ngapil pemutus kot ti deka ngelepaska Menyadi Dennis tumu. Utai ti nyelai iya nya, opis piak ti bedawa nya udah nyukung pemutus ngelepaska Menyadi Dennis beberapa hari sebedau sida ngetanka iya baru.

Menyadi Dennis kala diberi ukum jil pengelama enam taun. Iya udah dijil lebih ari tiga taun. Reti nya, kenyau ari setaun ti udah, iya layak minta diri dibibaska tumu, tauka nukar ukum iya lalu mayar ganti rugi. Iya udah nguji minta tu tiga kali, tang tiap kali, peminta iya enda diterima. Nyau kelama, peminta iya keempat diterima ba kot. Kena 23 Jun 2020, Kot Menua Lgov madahka pemutus ngelepaska Menyadi Dennis lalu ngasuh iya mayar ganti rugi. Artem Kofanov, seiku ari piak ti bedawa ke bisi enggau maya kes nya dipending, nyukung sereta besetuju enggau pemutus ngurangka ukum ke diberi ngagai Menyadi Dennis.

Dua hari udah bekau nya, seiku agi ari piak ti bedawa, iya nya Aleksei Shatunov, nuduh pemutus kes nya salah, minta pemutus nya dikinsil, lalu dipechara hakim ti baru ba kot ti sama. Aleksei Shatunov madah, peminta iya tu bepelasarka riput ti enda manah pasal Menyadi Dennis ari piak ti bekuasa ba rumah jil Lgov. Riput nya ngumbai Menyadi Dennis nya enda ngayanka pemagas sereta pemanah ulah ba dalam rumah jil.

Maya kes Menyadi Dennis diperesa kot kena 23 Jun, pengari rumah jil pan udah nguji madahka tuduh ti sama, tang hakim nya enggai nerima riput ti enda manah pasal Menyadi Dennis nya. Luyar ke ngarika Menyadi Dennis nunjukka surat ari lutur ti nerangka, Menyadi Dennis enda ulih ngereja pengawa ti berat ba rumah jil ketegal penanggul ba pengerai iya. Pengudah nya, pengari rumah jil lalu ngaku, ke bendar iya, nadai pengawa ke ulih diberi sida ngagai Menyadi Dennis ketegal iya enda bepengerai.

Seraya opis piak ti bedawa berengkah minta apil pemutus ngelepaska Menyadi Dennis, piak ti bekuasa rumah jil nya lalu ngerejister dua iti riput pasal Menyadi Dennis. Riput keterubah nya nuduh iya datai ba balai makai ba maya ti enda ngena. Riput kedua nya nuduh iya ngena baju t-shirt enggau nadai baju kot ba bengunan alai iya diau. Ketegal kedua-dua riput tu, sida mutuska ngetanka Menyadi Dennia ba sil senentang EPKT nya pengelama sepuluh hari. Nitihka undang-undang Rusia, orang jil enda tau ditan ba sil nya enti iya enda balat amat udah ngelanggar adat rumah jil dalam beberapa kali. Lalu, enti seseiku orang jil amat udah besalah, iya patut diperesa lutur dulu sebedau iya ditan ba EPKT. Ketegal Menyadi Dennis endang nadai ngereja penyalah ti balat nya, lalu iya pan nadai diperesa lutur, sigi nadai kebuah iya patut ditan ba senentang EPKT.

Sil alai Menyadi Dennis ditan amat mit; ti ngembuan buka enggau pemanjai kira tiga meter (10 kaki) enggau 2 meter (7 kaki). Iya mega diasuh bekunsika sil tu enggau seiku orang jil ke bukai. Bilik nya bekulat, lalu tu ngachau nambahka agi penyakit ke ditapi Menyadi Dennis. Beberapa bulan ti udah, iya kena pneumonia sereta napi penyakit raya ba urat belakang iya. Luyar ke ngarika Menyadi Dennis madahka “piak ti bekuasa dalam rumah jil sigi udah nemu pasal penanggul pengerai iya. Taja pia, iya diasuh tinduk ba peninduk ke amat kasar ti ngasuh iya balat amat pedis.”

Menyadi Dennis madahka luyar ke ngarika iya, ba maya iya dituduh ngelanggar adat rumah jil, bisi bala orang jil ke bukai sama enggau iya, tang iya seiku aja ti dianjung ngagai EPKT. Luyar iya nerangka: “Tu meh kebuah kami nyimpulka, semua utai tu nyadika tegal ngambika sida ulih nagang menyadi Dennis ari dibibaska pengudah pemutus kot nya.”

Piak ti bekuasa di menua Rusia terus ngiga chara ti baru sereta jai kena merinsaka bala menyadi kitai. Tang kitai tetap andalka Jehovah deka nyadi pelindung sida. Awakka kitai semua besampi ngagai Jehovah, minta Iya meri utai ti diguna ngagai Menyadi Dennis enggau bini iya Irina, ngambika sida mengkang tetap ati sekumbang penguji ti besai tu.—Masmur 94:13, 21, 22.