Nitihka riput berita rasmi, kena 13 Julai 2020, 110 buah rumah menyadi kitai ba menua Voronezh diserungkai bala polis ke bepegaika senapang. Kenyau ari 2017, nadai kala semayuh nya rumah menyadi kitai diserungkai dalam sehari. Dua iku menyadi lelaki kitai, Aleksandr Bokov enggau Dmitrii Katyrov, dijamah sereta dikemaluka laban enggai meri password handphone seduai iya ngagai bala polis.

Pengawa nyelungkai tu diatur Kot Pelilih Leninsky, lalu dipejalaika dalam abis nadai tujuh buah nengeri enggau kampung ba menua nya. Beberapa iku menyadi kitai ditaban ke opis penasat (Investigative Committee).

Ba pagi siti, kena 14 Julai 2020, Kot Pelilih Leninsky ngasuh sepuluh iku menyadi kitai ditan nyentukka sida dipechara kena 3 September 2020. Sida ke sepuluh iku nya: Aleksei Antiukhin 44 taun; Sergey Bayev 47 taun; Iurii Galka 44 taun; Valeriy Gurskiy 56 taun; Vitalii Nerush 41 taun; Stepan Pankratov 24 taun; Igor Popov 54 taun; Evgenii Sokolov 44 taun; Mikhail Veselov 51 taun; sereta Anatoliy Yagupov 51 taun.

Riput berita rasmi nya madahka 110 buah rumah udah diserungkai, tang naka ke diatu, 100 iti ruang bilik Saksi udah ngamatka riput nya pasal rumah sida empu ke udah diserungkai. Penyampau tu engka niki agi, tang kitai bedau ulih nemu enggau silik laban ke diatu, amat tusah deka berandau enggau bala menyadi ba din ketegal handphone enggau komputer sida udah dirampas.

Kena 10 Februari 2020, piak ti bekuasa nyelungkai 50 buah rumah ke enggi Saksi ba menua Transbaikal. Nadai kala semayuh nya rumah menyadi kitai diserungkai dalam sehari sebedau nya, nyentukka 13 Julai 2020. Kenyau ari pemutus Kot Besai Menua Rusia ba taun 2017, piak ti bekuasa udah nyelungkai lebih ari 1,000 buah rumah menyadi kitai.

Ketegal kitai nemu pasal jaku benabi Bup Kudus ti madahka semua utai tu deka nyadi, kitai enda tekenyit ati meda penguji ti balat ninggang bala menyadi kitai ba Rusia sereta menua bukai. Kitai tetap terus besampi ke bala menyadi kitai, lalu andalka Jehovah deka nyediaka utai ke diguna sida, nyengkaum roh kudus, ngambika ulih betan dalam pengarap.—1 Peter 4:12-14, 19.