Kena bulan Mei 2019, piak bekuasa ari Arkhangel’sk enggau Volgograd nuduh dua iku menyadi Kristian indu kitai ke udah tuai. Menyadi Kaleriya Mamykina (gambar ba atas) ke beumur 78 taun, enggau menyadi Valentina Makhmadgaeva ke beumur 71 taun ditasat ketegal sida dikumbai “ektremis”, laban nyadi Saksi-Saksi Jehovah.

Kena bulan April 2018, piak bekuasa ba menua Vladivostok nuduh Menyadi Yelena Zayshchuk ke beumur 84 taun, enggau empat iku da agi Saksi ke bukai ngereja penyalah. Ke diatu, bisi 10 iku bala menyadi Kristian ke beumur lebih ari 70 taun dituduh ngereja penyalah taja pan sida nyembah Jehovah dalam pemaik.

Taja pan nadai seiku ari sida dijil, tang tu tentu enda senang ba sida. Enti sida majak ditasat, lalu kot ngumbai sida salah, sida deka diasuh mayar denda ti besai tauka dijil.

Nyentukka 17 Jun 2019, bisi 215 iku menyadi kitai dituduh ngereja penyalah. Lalu penyampau nya majak nambah. Aram meh kitai terus besampika semua bala menyadi kitai ba Rusia. Enti ulih, kitai mega nyebut nama sida dalam sampi. Kitai amat andal Jehovah deka terus ngeringka sida enggau “semua pengering ti datai ari kuasa Iya ti bemulia” ngambika sida ‘tan natka semua pemerinsa enggau ati ti liat, enggau ati ti gaga.’—Kolosi 1:11.