Semilan hari pengudah Dennis Christensen nerima pemutus ti enda lurus ari kot Rusia, abis nadai tujuh iku Saksi-Saksi Jehovah kena perinsa. Sida dicharka ngena karan, mua sida dipampul nyentukka tusah enseput, sereta dipalu bala penasat Rusia ba menua Surgut, tunga ke barat Siberia. Sida merinsa bala menyadi kitai ketegal deka nemu alai bala menyadi begempuru sereta deka ngiga bala Saksi ke bukai.

Utai tu nyadi kena tumu pagi 15 Februari 2019. Polis ba menua Surgut enggau ngenyit datai lalu nangkap beberapa iku Saksi. Bala Saksi tu dibai ngagai opis Komiti Penasat. Ba endur nya, sida dipinta madahka pasal bala menyadi kitai. Tang, sida enggai madahka nama-nama utai. Pengudah kengka seiku luyar ke nasat kes tu mupuk ari endur nya, bala menyadi berengkah diperinsa. Nitih ku sida, polis mampul mua sida lalu ngikat nya enggau tali nyentukka sida tusah enseput. Jari sida mega dipelawik ke belakang lalu diikat. Udah nya, sida dipalu. Pengudah nelanjaika bala Saksi lalu ngunsai sida ngena ai, polis ngecharka sida ngena pistol karan. Sida diperinsa kira-kira dua jam.

Abis nadai tiga iku Saksi agi ditan dalam jil. Sida ke udah pansut terus ngiga lutur ngambika ngubat bakal sida. Pia mega sida ngeriput utai tu ngagai piak ti bekuasa ke bukai.

Kelimpah ari tu, pengudah datai ngagai endur bala Saksi enggau ngenyit, polis ba menua Rusia udah nuduh 19 iku Saksi-Saksi Jehovah ke dikumbai “enggau pengawa ti ekstremis” sereta “ngatur pengawa ke gerempung ekstremis.”

Nitihka Undang-Undang Jenayah Rusia, pengawa merinsa ke dikereja bala polis nya, ngelanggar undang-undang. Perintah Rusia mega bisi enggau sempekat begulai enggau beberapa iti menua bukai ke enda setuju enggau pengawa merinsa mensia. Nya alai, kitai deka enggau naka ulih ngiga bantu undang-undang enda ngira nengah kot ari menua tu tauka kot entarabansa kena mutarka jenayah tu.

Kitai nemu Jehovah meda pemerinsa ke ditapi bala menyadi kitai ba Rusia, lalu Iya deka nulung sereta nyelamatka sida.—Masmur 70:5.