Kot “Industrial District” ba Kursk, Rusia, deka bepecharaka kes Menyadi Andrey Andreyev, Menyadi Artem Bagratyan enggau bini iya, Alevtina, sereta Menyadi Andrey Ryshkov. a

Andrey Andreyev

• Ada: 1976 (Kursk)

• Biograpi: Iya jadi enggau Svetlana kena taun 1999. Seduai iya ngemesaika dua iku anak indu. Lebuh belajar pasal jaku benabi Bup Kudus ke udah dikeamatka, tu nyau narit ati iya deka belajarka Bup Kudus. Iya dibaptisa kena taun 2002

Alevtina Bagratyan

• Ada: 1977 (Kursk)

• Biograpi: Kenyau ari mit iya rindu seni. Lebuh agi biak, iya berengkah belajarka Bup Kudus. Iya dibaptisa kena taun 1997. Iya jadi enggau Artem kena taun 2012. Iya gawa nyadi tukang guntin lalu ba maya ti sama iya pan ngibun indai iya

Artem Bagratyan

• Ada: 1972 (Abovyan, Armenia)

• Biograpi: Iya pindah ari Armenia ngagai Rusia lalu betemu Alevtina ba Kursk. Seduai iya sama rindu meda utai ti ditempa Petara. Iya dibaptisa kena taun 2000

Andrey Ryshkov

• Ada: 1987 (Kursk)

• Biograpi: Apai iya nadai lebuh iya agi mit. Ketegal indai iya bisi dua iti kereja, maya umur iya agi biak, iya mayuh begulai enggau aki iya. Iya bisi mayuh tanya pasal pengidup ti ngenusahka ati iya dalam betaun-taun. Lebuh iya tetemuka saut ari Bup Kudus, iya belabuh bisi minat belajar pasal Bup Kudus. Iya dibaptisa kena taun 2011. Iya jadi enggau Marina kena taun 2016. Suba, iya gawa nyeruri apartment

Kena 16 Oktober 2019, bala pegawai Federal Security Service (FSB) nyerungkai mayuh rumah sereta nasatka mayuh Saksi-Saksi Jehovah ba Kursk. Ketegal tu, Menyadi Andrey Andreyev sereta Artem seduai Alevtina Bagratyan ditangkap. Pengudah nya, Menyadi Andrey Ryshkov pan ditangkap kena 21 Januari 2020. Tiga iku menyadi lelaki nya ditan kenyau ari nya nyentukka diatu, seraya sida nganti kes sida dipechara ba kot. Menyadi Alevtina pan ditan pengelama lebih ari 13 bulan, tang udah dilepaska kena 17 Disember 2020. Diatu iya ditan ba rumah diri empu.

Artem Bagratyan kena penyakit kemi manis. Lebuh ngenang pasal maya iya ditan sereta diserara ari laki iya, Alevtina nerangka: “Dalam siti timpuh ti panjai, aku enda nemu nama berita laki aku, tauka enti penyakit iya udah majak balat agi. Aku balat amat lelengauka iya.”

Tang, Alevtina madahka diri seruran andalka Jehovah deka nyaga iya sereta sida bala menyadi lelaki seraya sida ditan. Ku iya nerangka: “[Jehovah] sigi seruran ngeringka aku. Aku nemu Iya deka terus ngereja nya ke aku. Aku enda sekali-kali kakang ke Iya.”

Kitai andalka Jehovah deka terus nyadi baka sebuah menara ti tegap, alai tiga iku menyadi lelaki enggau seiku menyadi indu tu ngiga pengelikun ba maya ti tusah tu.—Jaku Dalam 18:10.