Sepuluh taun ti udah kena 10 Jun 2010, European Court of Human Rights (ECHR) ngumbai piak ti bekuasa di Rusia besalah laban udah balat amat ngelanggar undang-undang pasal hak mensia lebuh sida bebendar nguji nagang pengawa Saksi-Saksi Jehovah pengelama betaun-taun. ECHR nya ngukum menua Rusia lalu ngasuh mayar ganti rugi ti besai, sereta ngerejister baru Gerempung Saksi-Saksi Jehovah ba Rusia ti kala dikinsil piak ti bekuasa kena taun 2004.

Sepengudah ukum nya dipadah, chairman ke Komiti Saksi-Saksi Jehovah ba Moscow, Menyadi Ivan Chaykovskiy, madahka “Pemutus ECHR tu nunjukka sida nemu berunding, lalu tu ulih ngalahka ulah ti bepilih mata ke beduduk ba pengarap. Aku arapka pemutus tu deka ngasuh piak ti bekuasa berumban nentuka hak kami nitihka undang-undang, lalu perintah menua deka badu agi merinsaka Saksi-Saksi Jehovah di serata menua Rusia.”

Tang sayau amat, utai ke disadang Menyadi Ivan nya enda nyadi. Piak ti bekuasa di Rusia enda ngasika ukum ari ECHR nya. Kelimpah ari nya, sida ngemalatka pengawa merinsaka bala menyadi kitai di serata menua. Perinsa tu majak balat nyadi, nyentukka Kot Besai Rusia nagang sembah kitai kena taun 2017. Pengudah pemutus ti enda lurus nya digaga, mayuh ari menyadi Kristian kitai ditangkap, didawa ba kot lalu dijil.

Taja pan pemutus nya sepuluh taun ti udah, tang piak ti bekuasa agi salah guna kuasa sida. Kena taun 2010, ECHR nulak mayuh utai ke dituduh menua Rusia kereja Saksi-Saksi Jehovah. Nyentukka diatu, menua Rusia agi nuduh Saksi-Saksi Jehovah ngereja utai ti sama.

Pandakka jaku, ECHR madahka, nitihka undang-undang, Kementenrian Kehakiman Moscow enggau semua kot Moscow mega endang “nadai kebuah” nulak peminta gerempung Saksi-Saksi Jehovah deka ngerejister. Kot nya nganu piak ti bekuasa ba Moscow lalu madahka sida “enda mengkang neutral tauka ngetanka pengelurus baka ke patut.” Kelimpah ari nya, sida udah ngelanggar European Convention on Human Rights, iya nya, siti semaya ke digaga mayuh menua di Eropah, nyengkaum Rusia, kena ngetanka hak mensia.

Diatu, ba taun 2020, baka ke udah nyadi kena taun 2010, mayuh orang beratika utai ke nyadi ngagai menyadi kitai ba Rusia. Rachel Denber ari Human Rights Watch, siti gerempung ke mansik pasal hak mensia, madahka: “Lebuh Saksi-Saksi Jehovah bejalaika sembah sida ba Rusia, sida berambunka pengelepas sida. Sigi amat nadai kebuah utai tu patut nyadi ba sida.”

Enggau ati ti andal, kitai besampi ke Jehovah awakka Iya ngeringka bala menyadi kitai ba Rusia ke napi semua utai ti enda lurus tu, ngambika sida “sedia tan natka semua pemerinsa enggau ati ti liat,. . . enggau ati ti gaga.”—Kolosi 1:11.