Seraban pakar hak mensia ke gawa ke Pertubuhan Bangsa-Bangsa Bersatu (PBB) ngeluarka siti dokumen ti nuduh Rusia udah ngelanggar undang-undang entarabansa lebuh nangkap lalu ngetan ba jil 18 iku Saksi-Saksi Jehovah dalam beberapa nengeri, entara Mei 2018 ngagai Julai 2019. Seraban pakar nya nagih Rusia ngelepaska semua sida ke agi dijil enggau nadai tatak tauka penekul ba pengelepas sida.

Siti edisi tumu dokumen tu dikeluarka kena 15 Mei, 2020. Edisi ti penudi deka tembu lalu dikeluarka enda lama agi ba laman web PBB.

Tu kali ketiga Working Group on Arbitrary Detention (WGAD) madahka sukung sida ke bala menyadi kitai dalam timpuh setaun ti udah. Ba dokumen ti baru tu, WGAD bedawa pemayuh chara perintah Rusia udah merinsaka, sereta enda lurus enggau bala menyadi kitai.

WGAD nya madahka sigi nadai kebuah polis Rusia patut nangkap bala Saksi enggau chara ti amat kasar sereta mangah baka ke udah nyadi. Sida mega madahka “nadai seiku ari [Saksi Jehovah] patut ditangkap sereta ditan ba jil, lalu pia mega, nadai seiku pan patut dituduh ba kot nyentukka diatu, tauka didawa ba kot agi dudi hari.”

Seraban pakar nya enggau terang madahka bala Saksi sigi amat nadai kala ngereja pengawa “ekstremis.” Sida mega madahka, Saksi-Saksi Jehovah semina bejalaika sembah sida dalam pemaik, lalu nya endang amat hak ke enggi sida, sereta ukai salah nitihka undang-undang jenayah.

Dalam dokumen nya, seraban pakar nya pan bedawa chara bala menyadi kitai diintu dalam kot. Ngambika chunto, lebuh kes sida diperesa dalam kot, dua iku menyadi indu kitai dikurung dalam siti sangkar. WGAD nya nerangka, undang-undang entarabansa nentuka semua mensia bisi hak “dikumbai enda salah, nyentukka penyalah iya endang nyata ditunjukka bukti, nitihka undang-undang.” Ketegal tu, menyadi indu kitai sigi enda patut “dirantai tauka dikurung dalam sangkar lebuh kes sida diperesa, enggai ke sida digaga berupai baka penjenayah ti mangah sereta bahaya.”

WGAD nya nagih Rusia muai semua tuduh penjenayah ari semua 18 iku Saksi nya, lalu mayar sida nitihka ungkus ke ditetapka undang-undang entarabansa, ngambika nutup utai ti enda lurus ke nyadi ngagai sida. Menua Rusia mega diasuh “enggau silik sereta bendar, meresa baka ni utai ti enda lurus tu udah nyadi, ti udah ngujungka pengelepas bala Saksi dirampas” lalu “ngukum sida ke udah besalah ngelanggar hak [Saksi-Saksi Jehovah].”

Dokumen nya madahka, 18 iku Saksi tu semina “mimit ari pemayuh Saksi-Saksi Jehovah di Rusia ke udah ditangkap, ditan, lalu didawa udah ngereja pengawa penjenayah, semina laban sida bejalaika pengawa sembah sida,” lalu menua Rusia udah besetuju, nya meh hak mensia ti patut dijaga di baruh undang-undang entarabansa. Nya alai, taja pan dokumen tu ngembuan nama 18 iku Saksi aja, tang WGAB nya enggau terang sereta bendar madahka, pemutus sida nya “pan bisi kaul enggau tiap iku orang ke napi utai ti sama.”

Dokumen ti dikeluarka WGAB nya ukai reti iya Rusia amat deka ngelepaska bala menyadi kitai, tang kitai arapka nya deka nyukung kes bala menyadi kitai. Kitai nganti aja, meda saut ari Rusia. Tang ke diatu, seagi-agi bala menyadi kitai di Rusia enggau berani natka diri diperinsa, kitai andalka, Jehovah ti Apai kitai ti bepengerindu, deka terus ngemenuhka sida semua enggau pengaga sereta pemaik laban udah arapka Iya.—Rome 15:13.