Menyadi Oleg Danilov enggau Vladimir Ermolaev, Jr., a dua iku ari mayuh Saksi-Saksi Jehovah ba Rusia ke mengkang tetap ati ngagai Jehovah sereta gaga ati taja pan diperinsa. Dua iku menyadi tu nerangka, seduai iya dikeringka ari pemerani sereta pengarap kaban belayan sida suba.

Aki ini Oleg ke benama Fyodor enggau Yekaterina Rigel nyadi Saksi-Saksi Jehovah ba taun 1958. Lebuh perintah ngatur pengawa merinsaka Saksi-Saksi Jehovah, piak bekuasa Rusia nyerungkai rumah sida, ngerampas utai dikemisi sida sereta meri denda ngagai Fyodor. Taja pia, Fyodor nulung ruang bilik iya mengkang nyembah Jehovah enggau tetap.

Anak Fyodor enggau Yekaterina, iya nya Alfred enggau Ella (indai Oleg), dikelese sereta diperinsa seraya sida mansang besai. Alfred enggau Ella mega bisi pengarap ti tegap sereta mengkang tetap ati ngagai Jehovah. Lebuh Alfred diasuh nyadi soldadu, iya nulak. Ketegal nya iya dijil tiga taun.

Sebaka enggau aya iya Alfred, Oleg Danilov mega dijil pengelama tiga taun ketegal pengarap iya. Iya udah dijil kenyau ari Mac 2021. Iya diserara ari bini iya Nataliya, enggau dua iku anak lelaki iya, Ilya enggau Nikita. Sida sebilik pechaya Jehovah deka nulung sida betan, baka Iya ke udah nulung aki ini sereta aya Oleg.

Ku Oleg: “Aku suah berunding pasal baka ni kaban belayan enggau bala menyadi ke bukai ba Soviet Union ukai semina ulih betan aja, tang mengkang gaga ati.” Iya nampung: “Ba aku, tu bukti ke enda ulih disakal ke nunjukka kuasa roh kudus Jehovah. Aku andal kami sebilik ulih betan sereta mengkang gaga ati.”

Ini Vladimir, Jr., ke benama Anna Ermolaeva, belajarka pemendar ba taun 1953 ba kampung Serebrovo, Begian Irkutsk. Iya meh orang keterubah ba kampung nya ke dibaptisa nyadi seiku ari Saksi-Saksi Jehovah. Anna balat disakal bala jiran iya sereta indai iya. Indah, indai iya badu agi bejaku ngagai iya.

Lebuh piak bekuasa nemu Anna nginjil, sida nuduh iya mai bahaya ngagai anak lelaki iya, Vladimir, Sr. Ketegal nya sida ngemba deka nyeraraka iya ari anak lelaki iya.

Bala menyadi ba eklisia Anna nulis surat ke madahka Anna nya seiku indai ti manah. Seiku menyadi lelaki mai surat nya ngagai Moscow sereta nyadung surat nya ngagai pemerintah Soviet Union, Nikita Khrushchev. Enda disadang, Nikita minta utai tu diperesa. Udah nya, sida nemu jaku tuduh ngagai Anna nya enda betul, lalu anak lelaki iya enda diseraraka ari iya.

Anna mega bisi seiku anak indu ke benama Nadezhda. Ba taun 1970 iya tama sepital laban balat amat pedis ba perut. Iya diputung sebedau bala lutur nemu enggau silik nama penyakit iya. Maya berumban beputung, bala lutur madahka iya, iya enda tau enda nerima darah. Anna enggau Nadezhda sama enggai nerima pemutus nya ketegal pengarap sida. Bala lutur enda ningaka sida, nya alai sida meri Nadezhda darah ti enda ngena enggau darah iya empu. Sayau amat, Nadezhda mati enda lama udah nya. Kena ngelalaika penyalah nya, piak bekuasa nyalahka Anna ba dalam surat khabar ti tebilang. Sida madahka utai ti bula pasal Anna, iya nya, iya “ngenjukka anak iya nyadika pemeri.”

Utai ti ngenyinuka ati tu mai empas ti enda disadang ngagai laki Anna, Valentin. Sebedau tu, iya ngemendarka Anna ngajar bala anak sida prinsip Bup Kudus, tang iya empu enda nitihka nya. Lebuh iya meda baka ni bala menyadi Kristian Anna nyukung ruang bilik iya lebuh maya ti tusah tu, iya mutuska deka belajarka Bup Kudus lalu udah nya nyadi seiku ari Saksi-Saksi Jehovah.

Anna enggau Valentin terus ngelatih anak lelaki sida, Vladimir, Sr., kena nitihka prinsip Bup Kudus. Lebuh iya mansang besai iya jadi enggau seiku menyadi indu ke tetap ati ke benama Lyubov. Udah nya, Vladimir, Sr., enggau Lyubov ngajar anak seduai iya, Vladimir, Jr., rinduka Jehovah sereta nitihka prinsip Bup Kudus.

Ba Februari 2020, piak bekuasa nyerungkai rumah Vladimir, Jr., enggau bini iya, Valeriya. Vladimir, Jr., ditangkap sereta ditan. Udah nya iya ditan ba rumah diri empu pengelama nyauka dua bulan. Iya udah dituduh ngatur pengawa gerempung ke ditagang. Diatu iya benung nganti pemutus ari kot. Enti iya dikumbai besalah, iya ulih dijil pengelama 15 taun. Ari ke berunding pasal pemutus kot, Vladimir, Jr., ngenang pasal teladan aki ini sereta apai indai iya ti taluk.

Ku Vladimir, Jr., “Diperinsa ketegal nama Apai nya siti basa. Apai indai enggau aki ini aku betan napi penusah sereta mengkang tetap ati. Aku mega ulih ngereja nya.”

Sebaka enggau Oleg sereta Vladimir, Jr., mayuh Saksi ba Rusia beterima kasihka teladan ke ditetapka kaban belayan sida ti taluk. Arapka semua kitai belematika teladan sida ke mujur betan suba, sereta sida ke benung tan natka pemerinsa diatu. Lalu awakka kitai ‘nunda pengarap sida.’—Hebrew 13:7.