Kena 28 Oktober 2020, Kot Begian Bryansk ngaga pemutus pasal kes Menyadi Vladimir Khokhlov, Eduard Zhinzhikov, Tatyana Shamsheva enggau Olga Silaeva, ti sejalai enggau pemutus ti udah digaga sebedau tu ba kot bukai. Tiap iku sida kala diberi ukum jil entara setaun ngagai setaun tiga bulan. Tang, ketegal sida semua udah dijil sebedau kes sida dipechara ba kot, timpuh nya udah dikira, lalu sida enda ibuh tama jil baru. Pemutus ke digaga kot tu reti iya, nama sida empat iku agi deka dikumbai penjenayah, tang sida gaga ati laban bibas diatu. Nitihka undang-undang menua, piak bedawa enda tau ngapil baru, ngambika minta ukum ti berat agi.

Sebedau kot keterubah nya mutuska ukum sida, dua iku menyadi lelaki nya dijil pengelama 316 hari, lalu dua iku menyadi indu nya dijil pengelama 245 hari. Pengudah dilepaska, dua iku menyadi indu nya meri interbiu ba video Berita ti Pemadu Baru ari Raban ti Ngiring 2020 #5. Seduai iya madahka, utai ke nulung sida tan enggau gaga ati iya nya, sampi, macha Bup Kudus, sereta ngembuan runding ti beterima kasih.