Berengkah ari 16-18 Ogos 2019, konvensyen pelilih menua ba bansa jaku bengal bisu diatur ba Kigali, Rwanda. Penyampau orang ke datai bisi 620, lalu bisi 8 iku orang ke bengal bisu dibaptisa.

Dua iku pegawai ke kereja perintah mega enggau konvensyen tu kena Hari Minggu. Jean Damascène Bizimana, pengarah ba Rwanda National Union of the Deaf, enggau Emmanuel Ndayisaba, seketari ba National Council of Persons with Disabilities. Nambahka nya, surat khabar ari Ukwezi mega ngeriput berita pasal konvensyen kitai lalu madahka berita ti manah pasal pengawa nya ba Internet.

Bizimana madahka: “Konvensyen tu amat manah! Amat ngalitka ati meda orang ke bengal bisu ti datai ari mayuh endur ba menua, begulai sereta beserakup enggau pangan diri. Kami amat beterima kasih ngagai Saksi-Saksi Jehovah laban nyukung bala ke bengal bisu berandau enggau pangan diri. Bala pegawai perintah patut datai ngagai pengawa ke baka tu lalu nunda chara sida.”

Ba dua taun ti udah, bisi dua iti pengawa ke besejarah ke bala menyadi kitai ba endur ke begunaka bantu di RWS. Kena September 2017, pampang opis Rwanda ngatur Sekula Pengerintis ti keterubah ngena bansa jaku RWS. Setaun udah nya, ba bulan September 2018, pampang opis berengkah ngalihka litaricha kitai ngagai bansa jaku RWS.

Menyadi Jean d’Amour Habiyaremye, pengari ari pampang opis ba konvensyen nya madahka, “Kami amat gaga ati meda pemansang ba RWS. Tu nyengkaum pengawa konvensyen pelilih menua baka ke seharitu. Tema konvensyen ke betajuk, ‘Pengerindu Enda Nemu Abis!’ amat ulih dipeda ari chara Saksi-Saksi Jehovah ngayanka pengerindu ngagai orang, nyengkaum sida ke bengal bisu.”

Pemansang ke dipeda ba endur ti begunaka bantu dalam bansa jaku orang bengal bisu, nunjukka Jehovah terus nyukung nembiak Iya enggau mayuh!—Masmur 67:1.