Pengelama penusah COVID-19 tu, bala menyadi bebendar deka merindang ati orang bukai enggau chara nulis surat ti meransang. Menyadi Josué Laporta enggau bini iya, Vanesa, nulis surat ti meransang ngagai pekereja sereta pesakit COVID-19 ba siti sepital di Barecelona, Sepanyol. Seiku indu misi malas surat sida. Iya udah ngemendarka surat iya dikeluarka ba ditu, tang sebarang nama ke ayan ba surat nya patut dipelalaika. a

Aku tu seiku indu misi. . . Aku nulis surat tu ngarika [nama orang dibuai], seiku ini ke beumur 97 taun. Pagi tadi kami macha surat nuan ngagai iya. Surat ke diterima sepital ti disandung ngagai pesakit. Tang, aku nemu, surat ari nuan tu, ukai datai ke kami pia aja. Surat nuan nya udah nulung [nama pesakit] enggau aku . . . au amat, endang bisi pengadang. [Nama pesakit] engka enda ulih idup lama. Iya madahka aku, sebedau iya ninggalka dunya tu, iya enda tau enda nanya nuan, Josué: “Taja pan aku udah beumur 97 taun, kati nya amat aku agi tau bulih penguntung ari semaya ke dipadah dalam Bup Kudus?”

Pagi tadi aku ngambi awak sepuluh minit macha ke iya utai ari laman web ke dipadah nuan dalam surat. Penerang nya negu ati iya, lalu iya ngasaika pemaik sereta pengaga ati baka ke enda diasaika iya ngelama tu. Kami duai lalu meda video “Nama Kebuah Jesus Mati?”

Aku pan macha majalah [“Awake!”] pasal chara napi stress, lalu nya amat nulung aku betan napi penusah tu. Nuan nemu, penanggul tu endang enda senang.

Kami ke gawa ba sepital ditu nadai pakar psikologi alai ulih berandauka asai ati kami, tang penerang ke diberi nuan nya ulih digiga kami 24 jam, lalu kami ulih belematika penerang nya enggau dalam. Lebuh penusah penyakit berampit tu abis ila, aku deka belajar mayuh agi. Aku arap maya nya, nuan deka bisi awak alai ngajar aku semua utai ti patut ditemu aku, ngambika aku ulih andalka dunya ti manah agi endang deka datai. Aku nadai chukup jaku kena nerangka asai ati aku ti beterima kasih ngagai Petara, laban surat nuan datai ba maya ti amat ngena, chun-chun maya aku kereja sehari nya, ketegal nya aku nyadung surat nya ngagai pesakit bukai.

Arapka nuan enggau diri sebilik gerai magang. Aku andalka, pengarap ke dipegai nuan, diatu nulung nuan senang agi deka napi penusah tu, ari kami ke bukai. Terima kasih laban nuan meri awak ngagai orang baka [nama pesakit] enggau aku. Taja pan kitai enda ngelala pangan diri, tang, ketegal nuan, kami ulih bebendar tuchum baka ke enda digaga kami ngelama enam minggu ti udah.

Aku meri terima kasih enggau pengabis ati aku.

Surat baka tu meransang kitai terus nginjil seraya penusah penyakit tu ngenusahka pengidup kitai semua. Kitai besampi, ngambika milih jaku ti ngena, ti deka ngelantangka ati orang bukai.—Jaku Dalam 15:23.