Mayuh apai indai ke Saksi macha artikel ari Ruang Berita enggau anak sida ngambika negapka pengarap sida.

Menyadi Fumiko Takehara seiku indai ba menua Jepun. Iya suah macha sereta berandauka artikel ari Ruang Berita enggau anak lelaki iya, Naoki, ke beumur 12 taun. Seduai iya nyelak gambar bala menyadi ke dipadah dalam artikel berita nya lalu ngelekatka gambar sida ba dinding rumah. Ku Fumiko nerangka: “Kami besampi pasal sida enggau nyemetak. Kami berasai lantang, laban kami nemu Jehovah udah ngelantangka ati sida, nyengkaum sida ke dijil. Mua sida berupai gaga. Ketegal teladan sida ti manah, anak lelaki aku deka nunda sida lalu mengkang tetap ati ngagai Jehovah lebuh iya ba sekula.”

Menyadi Kilanko Zannou nya seiku apai ba Côte d’Ivoire ke bisi dua iku anak. Ku iya: “Ninting hari aku ka meda enti bisi berita baru ari Ruang Berita ba jw.org.” Kilanko suah berandauka artikel tu lebuh sida sebilik begulai belajarka Bup Kudus. Semua sida sebilik, nyengkaum anak iya Matthias ke beumur tujuh taun, udah belajar ari menyadi kitai ke natka pemerinsa enggau pemerani.

Matthias kala takut nginjil ngagai kaban ke sekelas enggau iya. Kilanko madah: “Pengudah belajarka Bup Kudus enggau diri sebilik, Matthias manjung: ‘Aku nadai agi takut nginjil!’”

Seiku apai ba Indonesia, Menyadi Holmes Simatupang, macha dua iti berita enggau anak iya pasal Saksi ke biak ba Indonesia ke dibuai ari sekula ketegal enggai nabi bendira.

Menyadi Simatupang madah: “Anak kami ke dua iku mega napi penguji ti sama ba sekula. Bala pengajar enggau anak bukai suah nekanka seduai iya, deka ngasuh seduai iya nabi bendira, belaguka lagu menua sereta masuk champur enggau pengawa pengarap ba sekula. Ketegal sakal tu, dalam siti timpuh seduai iya takut ngagai sekula.”

Holmes nampung: “Pengudah kami sebilik berandauka dua iti artikel nya maya belajarka Bup Kudus, seduai iya kempang ati nerangka kebuah sida enggai nabi bendira. Diatu, sida nadai agi balat irau pasal dibuai ari sekula.”

Menyadi Lady Nery Passos ari Brasil madah: “Anak lelaki kami ke benama Pedro patut nerangka kebuah iya enda ngintu hari pengada ba sekula. Maya nya, umur iya semina lima tauka enam taun aja.” Kena nulung Pedro, Lady ingatka artikel ba Ruang Berita pasal bala menyadi ke nyediaka diri dulu sebedau diuji. Ku iya nerangka: “Lebuh belajarka Bup Kudus enggau diri sebilik, kami belakun, awakka iya ulih belatih chara nyaut orang ke ngasuh iya ngintu hari pengada ba sekula.” Latih ke baka tu udah nulung Pedro ngetanka pengarap diri.

Lebuh macha artikel ba Ruang Berita, kitai dikingatka pasal chara Jehovah ngeringka sereta nyaga nembiak Iya ti tetap ati. Tu pan nunjukka, lebuh kitai napi penguji dudi hari, kitai mega deka ‘gaga amat ati sereta penuh laban roh kudus’ baka sida, lalu kitai ulih betan.—Surat Kereja Rasul 13:50-52.