Kitai diperansang terus betan lebuh macha berita pasal bala menyadi kitai ke napi pemerinsa. Lebuh macha profil sida, kitai bepeluang ngelala sida. Lalu lebuh macha utai ku sida pasal peneleba sida, tu ngasuh kitai andal sida betan natka penguji nya enggau ati ti gaga, lalu kitai empu dikeringka sereta ngasaika penyerakup enggau bala menyadi. Bacha meh utai ke diasaika menyadi kitai ari serata dunya ke bulih penguntung ari macha artikel ke bisi ba Ruang Berita.

Menyadi Miguel Silva enggau bini iya, Mónica, (peda gambar atas) pengerintis spesial di Portugal. Baka mayuh ari kitai, pengidup sida balat berubah ketegal penusah COVID-19. Tu ulih ngasuh kitai berasai balat irau sereta lelak. Taja pia, seduai iya diperansang ari macha berita pasal Menyadi Konstantin Bazhenov ba Ruang Berita. Konstantin deka macha Bup Kudus, tang iya nadai Bup Kudus dalam rumah jil. Ari ke lemi semengat, iya nuliska ayat Bup Kudus ke ulih dikingatka iya, lalu tu nyadika “Bup Kudus” iya empu. Ari tu, Miguel seduai Mónica belajarka siti utai ti beguna bendar. Ku Miguel nerangka: “Ari ke kelalu mayuh berunding pasal utai ti enda ulih dikereja kami sepemanjai pandemik tu, kami deka betatika lalu beterima kasih ke sebarang pengawa ti ulih dikereja kami seraya kami diau aja dalam rumah.”

Nambahka nya, Miguel seduai Mónica ngemansangka pengawa macha enggau belematika Bup Kudus ninting hari. Ku Mónica: “Kami andal, lebuh kami patut ingatka utai ke udah dipelajar kami ari Bup Kudus dudi hari, Jehovah deka nulung kami ingatka nya.” Miguel nambah: “Ketegal pandemik tu, kami ngasaika diri baka ke ‘ditan ba rumah.’ Peneleba Menyadi Konstantin ngingatka kami, tu siti peluang ke kami, meransang orang bukai, belagu enggau gaga ati ngagai Jehovah sereta ngemanahka agi sampi kami.”

Menyadi Christine Mouhima Etonde nya seiku pengerintis biasa ari menua Cameroon. Iya ngaku, dalam betaun-taun ti udah iya amat takut diperinsa. Tang iya nerangka: “Macha artikel ari Ruang Berita pasal bala menyadi ke natka diri diperinsa nulung aku ngubah runding aku. Ari macha pasal runding ke dikembuan sida, sampi sida ke nyemetak, chara sida nyediaka diri sebedau diperinsa (enda ngira tuai biak) sereta meda mua sida ti tuchum, nya meransang aku ngelala Jehovah enggau dalam agi. Pengerindu aku ke Jehovah majak nambah, nyentukka aku ulih ngambarka diri diperinsa dudi hari, tang aku nadai penakut. Aku ulih ngambarka diri maya nya ila ngayanka pengaga ati, besampi sereta berunding enggau dalam pasal Jehovah.”

Menyadi Iulian Nistor enggau bini iya, Oana, ari Romania berasai diperansang ari chara Menyadi Anatoliy Tokarev ngetanka pengarap diri ba kot. Iya enda nyadi pedis ati, tang seruran ngayanka basa sereta keran deka mengkang taluk. Teladan iya meransang Iulian seduai Oana berundingka pasal baka ni chara seduai iya ulih ngetanka pengarap diri enti dipechara ba kot. Ku Oana ngenang: “Lebuh kami belajarka Bup Kudus enggau diri sebilik, kami ngambarka diri ngetanka pengarap kami di mua bala kot. Enda senang ka nerangka utai ke dipechaya diri enggau nelap sereta basa, baka ke dikereja bala menyadi kitai. Pengudah abis belajar enggau diri sebilik, kami berasai semak agi enggau bala menyadi. Kami mega dikingatka pasal kebuah kami patut besedia ngetanka pengarap diri, sereta kebuah kami temegah ati nyadi Saksi Jehovah.”

Menyadi Anna Ravoajarison ari Madagascar diperansang meresa naka ni pemanah enggau kualiti sampi iya. Pengudah macha peneleba Menyadi Jovidon Bobojonov, ku Anna madah: “Kekadang, maya aku kelalu kisuk enggau pengawa diri, aku seruran nandu utai ti sama aja dalam sampi. Aku patut ngambi awak mimit dulu, lalu berundingka nama utai ke deka disampika aku ngagai Jehovah.” Iya mega belematika teladan Jovidon lalu nguji ngambarka asai ati iya. Iya nanya diri empu, ‘Enti aku diperinsa baka iya, kati aku ulih besampi enggau nyemetak baka iya?’ Ku Anna nampung: “Tu ngajar aku, aku patut ngetu dulu lalu belemati, nama utai ke deka disampika aku. Aku amat beterima kasih ke artikel baka tu.”

Menyadi Ruben Catarino enggau bini iya, Andreia, pengerintis biasa ba Portugal. Seduai iya berasai semak agi enggau bala menyadi. Ku Ruben madah: “Suba, kami sigi nemu bisi bala menyadi ke diperinsa ba menua bukai, tang kami enda ngelala sida. Kami enda nemu sapa sida ke bendar, baka ni gaya pengidup sida, tauka nama penguji ke ditapi sida. Tang ari artikel ba Ruang Berita, diatu kami amat ngelala sida. Kami ulih besampi ke sida enggau nyemetak laban udah nemu utai ke ditapi sida. Tu ngasuh kami berasai semak agi ngagai sida, lalu laban sampi kami ke sida nyemetak agi, sampi nya pan bekuasa agi.”

Tentu mayuh ari kitai setuju enggau utai ku Menyadi Cecilia Cardoso, seiku pengerintis biasa ari Portugal ke madah: “Nemu pasal utai ke ditapi bala menyadi nulung aku ngemeranka agi belajarka Bup Kudus kediri empu. Ketegal bebendar agi belajarka Bup Kudus, aku andal agi ngagai Jehovah, lalu pengerindu aku ke Iya pan majak dalam. Iya deka nulung ngurangka penakut aku, nyentukka nya mit baka pasir aja. Aku udah belajar, kitai deka alah laban penakut enti kitai badu agi bepanggai ngagai Jehovah.”

Kitai beterima kasih ke teladan bala menyadi kitai ti berani sereta tegap ba pengarap, ke ulih dibacha kitai nengah jw.org. Peneleba sida nulung kitai ‘kempang ati nyebut, ‘Jehovah endang penyaup aku, nya alai aku enda takut.’’—Hebrew 13:6.