Bala menyadi di serata dunya ngena artikel ke ayan ba pun laman jw.org ba pengawa nginjil enggau belajarka Bup Kudus kediri empu. Utai tu mai mayuh asil ti manah baka ditunjukka ari pengalaman ba baruh tu.

Seiku tuai ti ngabas ba Kanada madahka, dalam beberapa bulan ti keterubah pengudah pandemik berengkah, kira-kira 75 peratus penginjil ba pelilih menua ke dikemataka iya udah ngena artikel “Baka Ni Gaya Nuan Lebuh Kediri Aja?” ba pengawa nginjil. Ngambika chunto, seiku menyadi indu nganjung link artikel nya ngagai enam iku orang ke sama gawa enggau iya. Beberapa iku ari sida madahka diri beterima kasih.

Seiku bini tuai ti ngabas ba Togo nganjung link artikel “Empat Penunggang Kuda—Siapakah Mereka?” ngagai kaban belayan enggau orang ke dikelala iya. Asil iya, bisi tujuh iku orang belajar Bup Kudus enggau iya.

Ketegal pandemik COVID-19, nembiak ba sekeda menua patut belajar nengah online. Seiku menyadi indu ke biak ba Scandinavia madahka diri beterima kasihka artikel ke baru-baru tu, iya nya “Belajar ari Rumah—Kati nya Ulih Mujur?” Artikel tu mayuh nulung bala nembiak ke belajar nengah online. Iya madahka: “Aku enda ulih nembuka kereja sekula ba maya ke udah ditetapka. Tang udah nya artikel tu pansut. Situasi aku nyadi manah agi pengudah ngena utai ke dipadah ba artikel tu.”

Lebih ari 1,600,000 iku orang ngelawa pun laman ba jw.org ninting hari.

Kitai amat beterima kasih ngagai Jehovah ke artikel ti udah nulung kitai belajarka Bup Kudus kediri empu sereta ‘bekereja nyadi penginjil, lalu ngereja semua pengawa kitai.’—2 Timoti 4:5.