Ujan balat nyadi ba menua Belgium, Jerman, Luxembourg sereta Belanda ari 13 ngagai 17 Julai 2021. Ketegal nya, mayuh sungai ampuh sereta ngujungka sekeda orang bebadi. Kami bedau temu ni pemalat pengerusak nyadi. Menua tu enda kala ditinggang bah ti balat baka tu dalam 100 taun ti udah.

• Nadai menyadi balat bakal tauka bebadi

• Abis kurang 304 iku penginjil dipindahka ari rumah sida

• Kekira 100 buah rumah menyadi balat rusak

• Abis kurang 242 buah rumah mimit rusak

• 11 buah Palan Gempuru rusak

• 4 iti Komiti Tulung Pengerusak Alam (DRC) ditumbuhka; siti ba Belgium, 2 iti ba Jerman enggau Luxembourg, sereta siti ba Belanda

• Ke diatu, semua DRC nya benung ngatur pengawa meresi sereta ngadu rumah, nyengkaum ngerangkaika rumah sereta muai tanah luchak. Sida mega ngaduka utai ti patut enggau lengkas

• Bala menyadi ari DRC sereta tuai gempuru ba endur nya nyediaka endur belindung sereta ai irup ke beresi ngagai sida ke patut dipindah

• Bala tuai ti ngabas ba endur nya meransang bala menyadi sereta meri jaku ti ngelantangka ati ari Bup Kudus

• Gempuru nengah konferen video enda diketuka. Komiti Pampang Opis nyediaka peransang ke bala menyadi ke ditinggang penusah

• Semua bala menyadi ke enggau pengawa meri bantu ngasika iring kena nyeliahka COVID-19

Bala tuai gempuru ba siti eklisia di Belanda nulung seiku menyadi indu ke tuai ngambika iya ulih mindah ngagai endur ti likun agi. Udah nya sida betalipun ngagai anak lelaki menyadi indu nya ke ukai Saksi Jehovah lalu madahka iya indai iya diatu udah selamat. Anak nya madah ngagai indai iya: “Manah amat pengarap nuan. Sida nyaga nuan enggau manah!”

Seraban bala bomba ba menua Belgium beratika bala menyadi kitai ke benung meri bantu ngagai orang ke ditinggang penusah. Sida muji bala menyadi kitai laban bala menyadi kitai ngena perengka ti patut kena nyaga pengelikun diri. Lalu bala menyadi kitai mega amat teratur. Pia mega, ba menua Jerman seraban bala bomba amat alit ati enggau bala menyadi kitai ke sanggup bekerejasama enggau sida. Seiku ari sida madah, “Endaka nya manah enti bisi orang baka kita ba semua endur?”

Bala menyadi ke ditinggang penusah amat beterima kasih ke tulung ti udah diterima ari gerempung. Sida mega beterima kasih laban Raban ti Ngiring meransang nembiak Jehovah besedia kena napi pengerusak alam. Lalu ke pemadu beguna, sida beterima kasih ke Jehovah ke nentuka nembiak Iya seruran “diau likun, lalu nadai kebuah takut.”—Jaku Dalam 1:33.