Taja pan nembiak Jehovah udah bebendar nguji nyaga pengelikun diri empu sereta orang bukai pengelama penusah coronavirus tu, tang sekeda ari menyadi kitai udah nadai laban kena penyakit tu. (Pengajar 9:11) Sayau amat, 872 iku ari bala menyadi kitai di serata dunya udah nadai ketegal dirampit penyakit COVID-19. Bala menyadi kitai enggau lengkas meri jaku peransang sereta sukung ngagai sida ke balat tusah ati laban lenyau orang ke dikesayau. (1 Korint 12:26) Ke berat agi, bala menyadi kitai bepanggai ba Jehovah, ti seruran ngamatka semaya Iya deka meri ‘pemaik Petara’ baka ke ditulis ba Pilipi 4:7.

Seiku menyadi indu kitai ke diperindang gerempung Jehovah diatu nya Hannchen Unnützer. Iya seiku pengerintis spesial ba Bolzano, di Itali Utara. Sayau amat, laki iya, Menyadi Manfred Unnützer, madamka seput kena 28 Mac, 2020, ketegal coronavirus. Menyadi Manfred udah gawa penuh jam ke Jehovah pengelama nyauka 58 taun, lalu bini iya begulai enggau iya ba pengawa tu pengelama 54 taun. Seduai iya kala ngereja pengawa tuai ti ngabas pengelama 25 taun. Nyauka 1,000 iku menyadi ari beberapa menua ningaka cheramah pemati iya ngena video call.

Menyadi Hannchen madah: “Aku amat beterima kasih ngagai semua bala menyadi aku. Indah sejam aja deh, sida nadai nejuka aku kediri aja. Aku ngasaika penyayau ti amat besai! Sida meransang aku, ngelantangka ati aku ngena Bup Kudus sereta nyediaka utai ti diguna aku. Aku sayauka semua bala menyadi aku.”

Menyadi Maria Jose Moncada enggau laki iya, Darwin, pan udah disukung bala menyadi ba maya ti tusah tu. Seduai iya nginjil ba eklisia bansa jaku Quichua di endur ti bebukit ba menua Ecuador. Sayau amat, apai indai Menyadi Maria bela mati ketegal coronavirus dalam timpuh 6 hari aja. Indai Maria, iya nya, Menyadi Fabiola Santana Jordan, beumur 56 taun, lalu iya seiku pengerintis biasa. Apai Maria nya Menyadi Ricardo Jordan ke beumur 60 taun, lalu iya tu seiku penulung gempuru di Eklisia Praderas di nengeri Guayaquil. Kelimpah ari nya, dua iku menyadi lelaki Maria pan kena COVID-19, tang seduai iya udah gerai.

Menyadi Maria balat tusah ati, nya alai, iya deka bejalai pengelama empat jam ngagai Guayaquil ngambika begulai enggau diri sebilik iya, sereta nulung pengawa nguburka apai indai iya. Tang, seduai iya besampi dulu sebedau ngaga pemutus, lalu ngasaika diri enda patut bejalai kin. Seduai iya ulih berandauka semua pekara nya enggau diri sebilik ngena video call. Menyadi Maria madah: “Enti sema kami duai kin, pemutus kami ulih ngachau pengerai kami empu sereta orang bukai.”

Amat, Menyadi Maria madahka diri berasai balat tusah ati sereta irau, tang seduai laki iya mengkang nyembah Jehovah sereta “enda ngetu-ngetu besampi ngagai Jehovah, minta iring ari Iya.” Kena nyediaka diri ngintu pengawa Ngingatka Pemati Jesus, seduai iya pan mai pemelajar Bup Kudus ningaka cheramah nya, sereta macha ayat Bup Kudus pasal pengawa ke dikereja Jesus dalam beberapa hari sebedau iya mati. Pia mega, seduai iya nginjil ngena surat, sereta datai begempuru ngena video call. Pengujung iya, semilan iku ari kaban belayan Menyadi Maria ke ukai Saksi Jehovah ningaka cheramah Ngingatka Pemati Jesus dalam bansa jaku Sepanyol.

“Taja pan enda senang ke sida, tang sekeda pemelajar Bup Kudus meda cheramah Ngingatka Pemati Jesus ngena perengka elektronik, lalu nya amat meransang kami,” ku Menyadi Maria. Iya nampung: “Aku mega tekenyit sereta gaga ati meda bala kaban belayan aku ke ningaka cheramah nya taja pan sida diau ba menua bukai.”

Menyadi Maria nambah: “Utai ke ditapi tu ngajar kami, enda ngira ni pemalat penusah ke diasaika, ari ke nadai ngereja nama-nama utai, enti kitai naka ulih nyembah Jehovah, Iya deka merekatka kitai sereta merindang ati kitai.”

Semua bala menyadi bela sinu ati ke sida ke lenyau orang ti dikesayau ketegal penyakit berampit tu. Kitai deka terus besampi ke sida ti balat tusah ati diatu. Kitai enda sabar nganti maya ila Jehovah deka muai semua macham pemedis, nyengkaum penyakit berampit, lalu Iya deka ngidupka baru nembiak iya ke tetap ati ti udah nadai.—1 Korint 15:21, 22.