Dalam bulan November, Saksi-Saksi Jehovah di serata dunya nyadung majalah Menara Jaga No. 2 2020 ngagai kaban belayan, orang ke bisi minat ba Bup Kudus sereta bisnes ba kandang alai sida nginjil. Utai ti spesial pasal kimpin tu, Saksi-Saksi Jehovah mega bebendar nguji nyadung majalah tu ngagai bala pegawai perintah menua. Pampang opis di serata dunya udah nerima mayuh riput ti manah, lalu mayuh ari surat ke dianjung dibalas enggau manah.

Ba Sierra Leone, Rex Bhonapha, Menteri Muda Kedua Pengatur Tanah, Berumah enggau Perambu Mengeri nuliska surat kena meri terima kasih ngagai bala menyadi ke majalah nya. Iya madah: “Majalah ke diberi kita tu, amat meransang sereta ngajar utai ti manah. Diatu, aku ka macha iya ninting hari.”

Perdana Menteri Samoa udah malas enggau surat terima kasih, madahka iya pan setuju Sampi Tuan nya amat beguna. Pia mega, President Tuimalealiifano Vaaletoa Sualauvi II madahka diri amat beterima kasih ke pengawa kitai ke ngajar orang pasal Bup Kudus. Iya madahka pengawa nginjil tu “nulung orang, ngajar sida pasal Bup Kudus, ngambika sida ulih ngubah pengidup sida.” Iya mega muji pemutus bala Saksi Jehovah ti ngetu nginjil ari rumah ke rumah sereta begempuru enggau orang mayuh sekumbang musin penyakit COVID-19.

Osvaldo Cartagena García, seiku Sekretari Daerah di menua Chile madahka: “Aku arapka kimpin kita deka ngajar semua pegawai ke megai kuasa ba menua tu, lalu meransang sida ngereja utai ti badas ngagai semua rayat ba komuniti. Tu beguna bendar diatu ketegal penusah ke diasaika mensia ba menua tu enggau di serata dunya.”

Seiku pegawai politik ba menua Jerman ke benama Deutscher Bundestag nulis siti surat nuju ngagai Pampang Opis Eropah Tengah di Jerman. Iya nulis: “Aku sigi ngelala pengarap Saksi-Saksi Jehovah. Aku amat bebasaka bala Saksi ti, enggau berani, ngaku diri enggi pengarap tu. . . . Aku mega nemu, Saksi-Saksi Jehovah meh ke pemadu balat diperinsa di baruh perintah Nazi suba.”

Siti ari Opis Perintah Nengeri di Jerman nulis siti surat ngagai Saksi-Saksi Jehovah lalu meri terima kasih laban udah ngelantangka ati orang sekumbang penusah penyakit berampit tu. Sida madah: “Lebuh kita ngelantangka ati orang, kita pan amat nulung semua rayat ba menua tu diau beserakup agi.”

Ba Colombia, seiku ari Dewan Negara enggau seiku ari Dewan Rakyat nulis surat terima kasih ngagai pampang opis di menua nya. Seduai iya sama madahka diri deka bekunsika penerang nya enggau orang bukai. Seiku pegawai ari Opis Nyaga Rampa Menua enggau Pemansang Menua mega nulis: “Besai terima kasih ngagai kita laban udah nganjung majalah Menara Jaga ke aku, laban majalah nya ngundan pesan ti ulih nyelamatka nyawa!”

Frank Okyere, iya nya pengari menua Ghana ngagai menua Jepun, madahka: “Majalah tu amat manah laban iya nerangka chara ti ulih mujur mutarka mayuh ari penanggul ke ditapi mensia.”

Pia mega, seiku pengari menua Azerbaijan madah: “Terima kasih laban udah nganjung edisi spesial Menara Jaga ke opis kedutaan kami. Aku amat minat macha majalah tu.”

Munyi ku Menyadi Amaro Teixeira ke ngemataka Begian Penerang ke Orang Mayuh di Pampang Opis Mozambique: “Asil ti manah ari kimpin tu udah ngelui ari ke disadang kitai. Kitai udah ngena peluang tu meritaka Perintah Petara ngagai orang ke tusah ditemu kitai.” Kitai pan setuju enggau jaku iya.

Tentu kitai deka nerima mayuh agi surat terima kasih ari bala pegawai enggau orang bukai ke ningaka pesan Bup Kudus ti dibai ngagai “semua orang ke megai kuasa.”—1 Timoti 2:2.